Read Batak Simalungun JOB 38 Bible Online

JOB 38 - Batak Simalungun bible

JOB 38

¹Dob ai roh ma balos ni Naibata hubani si Job marhitei habahaba, nini ma, [593]

²“Ise do in, na sihol pagolap uhur ni Naibata marhitei hata na so marpanimbangion? [594]

³Mahua gonditi ma binongeimu songon dalahi, ase husungkun ho, anjaha ajari ma Ahu. [595]

⁴Ija do ho, sanggah Hubahen onjolan ni dunia on? Patugah ma Bangku, anggo na maruhur do ho. [596]

⁵Ise do na mambahen sibaranni? Ai lang ibotoh ho do gakni ai! Ise do na pagistang tali panibar i atasni? [597]

⁶I atas aha do ipajonam tiang partunggulni, anjaha ise do na patibal batu parsuhini, [598]

⁷sanggah rap mandoding bintang sogod-sogod anjaha marolob-olob ganup anak ni Naibata? [599]

⁸Ise do na manutup laut bani labah, sanggah pultak bahni hun partapaan, [600]

⁹sanggah Hujadihon hombun gabe hiouni, pakon hagolapan gabe hiou ampanni? [601]

¹⁰Sanggah na Hutontuhon parbaloganni, anjaha na Hubahen ransang-ransang ampa labahni, [602]

¹¹anjaha ningku, ʻSibar jon do ho bulih roh, seng bulih lopusanmu, anjaha ijon do maningon marsaran gunsang ni gilumbangmu!ʼ [603]

¹²Ongga do ho sadokah goluhmu mangkatahon siang ari, barang patugahkon hubani sibalik huning iananni, [604]

¹³ase ijolom ujung ni tanoh on, anjaha iusir hunjai halak parjahat? [605]

¹⁴Salih ma ai songon tanoh halampung na hona tokan, anjaha iset songon hiou.

¹⁵Itarik do humbani halak parjahat haliharon ni sidea, anjaha iponggolhon tangan na mangondam. [606]

¹⁶Ongga do ho masuk hu sombul ni laut, anjaha ongga idalani ho tondolan ni luhung ai? [607]

¹⁷Ongga do ididah ho buha labah ni hamatean, atap ongga do ididah ho horbangan ni halotiron? [608]

¹⁸Ongga do tartatap ho habolagon ni dunia on, patugah, anggo ibotoh ho do ganupan ai.

¹⁹Ija do dalan laho hu ianan ni haliharon, anjaha ija do ianan ni hagolapan, [609]

²⁰ase boi boanonmu ai mulak bani iananni, anjaha ibotoh ho do dalan laho hu rumahni?

²¹Ibotoh ho do hap ai, ai ijia do ho tubuh, anjaha domma buei bilangan ni ari-arimu!

²²Domma ongga ho hu kamar panimpanan ni salju, anjaha domma ongga ididah ho gudang ni sira-sira,

²³na Hutagangi bani panorang hasosakan, bani panorang marsimunsuhan ampa porang? [610]

²⁴Ija do dalan hu ianan parbolahan ni logou, barang ianan parserakan ni logou hapoltakan hu tanoh in?

²⁵Ise do mambahen bondar bani bah udan, anjaha ise do mambahen dalan bani hilap, [611]

²⁶laho mangarbahi tanoh na so marisi jolma, ampa halimisan na so marisi jolma,

²⁷laho pabosur tanoh dorging-dorging anjaha horah-horah, anjaha mambahen martumbor poyon-poyon na maratah?

²⁸Naha, ai marbapa do udan, anjaha ise do na manubuhkon tektek ni namur?

²⁹Ise do na manubuhkon es, anjaha ise do na manjadihon salju? [612]

³⁰Gabe mapir do bah ai songon batu, anjaha sisik ni luhung ai marhimpang.

³¹Mangasup do ho mamudun tali ni bintang hala, barang mangkarhari tali ni bintang pariama? [613]

³²Boi do paluaronmu bintang na marlinang-linang bani panorangni bei, barang boi do togu-toguonmu bintang gipul ampa anakni?

³³Ibotoh ho do undang-undang ni langit? Ho do na manontuhon kuasani i tanoh on? [614]

³⁴Boi do pagijangonmu soramu das hu hombun ai, anjaha ra do udan mapor mambalosi ho? [615]

³⁵Ai ho do marsuruh, ase laho hilap ai, anjaha ihatahon bam, ʻTonggor ma, andon ma hanami roh!ʼ [616]

³⁶Ise do na mannahkon hapentaran ibagas hombun ai, anjaha ise do na mambere uhur bani hombun na marganjang ai? [617]

³⁷Ise do na boi mamilangi hombun ai marhasoman hapentaran, anjaha boi manguseihon gusi ni langit ai, [618]

³⁸sanggah mapir tanoh ai songon bosi, anjaha rapat bei ulbakni?

³⁹Ai ho do na marburu sipanganon ni singa boru-boru, barang na pabosurhon lohei ni anak ni singa, [619]

⁴⁰sanggah modom sidea ibagas liangni, barang sanggah mangonggopi ibagas naporon? [620]

⁴¹Ise ma na pasirsirhon sipanganon bani kawak, sanggah siok-siok anakni hubani Naibata, sanggah mordong ia halani seng dong sipanganon?” [621]