Read Batak Simalungun JOB 39 Bible Online

JOB 39 - Batak Simalungun bible

JOB 39

¹Ibotoh ho do sadihari maranak bedar? Ongga do ipardiatei ho sanggah laho marmurik ursa boru-boru? [622]

²Ibotoh ho do bilangan ni bulanni rambong, anjaha ibotoh ho do panorangni manunas?

³Iundukkon bani, jadi tubuh ma anakni, dob ai salpu ma pangarouonni ai.

⁴Lambin gogohni ma anakni anjaha marbanggal ibagas naporon; dob ai laho ma sidea, seng simulak-mulak bani indungni.

⁵Ise do na pajalang halode liar? Ise do na mangkarhari tali ni halode na lingkat? [623]

⁶Bani do Hubere tanoh pamah bahen rumahni, anjaha tanoh garam bahen iananni.

⁷Ipartawai do harameion ni kota, seng itangihon sorgang ni sais.

⁸Mawat-awat do ia i dolog mangindahi sampalanni, anjaha ipindahi do poyon-poyon simaratah.

⁹Ai ra do badak ai gabe parhorjamu! Mintor ra ma ia marborngin i lambung ni palangkamu?

¹⁰Mintor mangasup ma ho manambat badak laho maninggala, barang tumaram ma balosanni ho manisir i habungan?

¹¹Boi ma marnalom ni uhur ho bani halani na margogoh tumang ai ia, barang tarondoskon ho ma bani horjamu?

¹²Tenger do uhurmu bani laho manarui gandummu, barang patumpuhon ai bani pardogeianmu?

¹³Jenges do pamerper ni habong ni burung unta; tapi siparholong atei do ia?

¹⁴Itolurhon tolurni hu tanoh, anjaha ipaturut do tanoh ai mamosahi ai;

¹⁵lupa do ia, na boi ai posah bahenon ni nahei, anjaha na boi lotlotan ni binatang.

¹⁶Lang maruhur holong ia bani anakni, hira seng ia simadasi; seng iuhurhon atap sisoya-soya holi halojaanni ai,

¹⁷halani seng ibere Naibata bani hapentaran, anjaha marrupei ia bani panimbangon.

¹⁸Sanggah iperperhon habongni laho lintun, ipartawai do huda ampa na mangajaksi.

¹⁹Ai ho do sibere gogoh bani huda? Ho do na mannahkon jumbakni hubani borgokni?

²⁰Ho do mambahen lumpat-lumpat ia songon balang? Jangin do parihei-iheionni. [624]

²¹Kais-kais do ia i tanoh habungan anjaha malas uhurni, ibagas hagogohon luar do ia manjumpahkon sinjata.

²²Ipartawai do habiaran, seng haru uhurni, seng manlembang ia mulak mangidah podang.

²³Mardapar-dapar pe sarung ni sior i babouni, marhilap lombing pakon tanja;

²⁴marah anjaha maranjak do ia, ikaisi tanoh, seng tartagangi, dob marhata tarompet.

²⁵Marhatahonsi tarompet marihei-ihei ma ia, humbani na daoh ope domma taranggohsi uap ni parporangan, sonai homa sora gogoh ni puanglima ampa surak-surak.

²⁶Halani hapentaranmu do ase habang hu atas haluhuy, anjaha iherbangkon habongni dompak dangsina?

²⁷Halani parsuruhmu do ase habang manuk-manuk nanggordaha dompak datas, anjaha ibahen asarni bani ianan na gijang? [625]

²⁸I atas dolog batu do iananni pakon asarni, i ujung ni dolog batu ampa i pakpak ni dolog.

²⁹Hunjai do itungkir-tungkir sorohanni, daoh do panatap ni matani.

³⁰Daroh do isopsop anakni, anjaha ija halak na tartampul ijai do ia. [626]