Read Batak Simalungun JOB 40 Bible Online

JOB 40 - Batak Simalungun bible

JOB 40

¹Dob ai marsahap ma Jahowa hubani si Job,

²“Sihol do partinggilhonon ni halak siparhutuk, Pargogoh Na So Tarimbang in? Ibalosi siaduhon Naibata in ma on?” [627]

³Dob ai nini si Job ma mambalosi Jahowa,

⁴“Aha pe lang ahu; naha ma ningku mambalosi Ham? Hututup ma gelah pamanganku bani tanganku. [628]

⁵Domma marsahap ahu sahali, seng ulakanku be ai; dua hali tene, tapi seng nunutonku be ai.” [629]

⁶Dob ai roh ma balos ni Jahowa hubani si Job humbani habahaba, nini ma, [630]

⁷“Gonditi ma binongeimu songon dalahi; adong do sungkunon-Ku bam, anjaha patorang ma hu Bangku. [631]

⁸Sihol parsedaonmu do uhum-Hu? Sihol salahkononmu do Ahu ase pintor ho? [632]

⁹Ai partangan songon tangan ni Naibata do ho? Mintor tarbahen ho ma marsora longgur songon-Si? [633]

¹⁰Pajagar ma dirimu marhitei hamuliaon ampa hatimbulon, marhiou hatunggungon ampa hasangapon ma ho. [634]

¹¹Pataridahkon ma gajag ni ringismu, pardiatei ma haganup sigijang maruhur anjaha patoruh ma ai. [635]

¹²Kawahkon ma ganup halak na jungkat maruhur anjaha patunduk ma ai, anjaha lotloti ma halak parjahat bani iananni.

¹³Ponopkon ma sidea hubagas orbuk, anjaha tambatkon ma bohi ni sidea bani ianan na ponop.

¹⁴Jadi dihut ma Ahu homa mamuji ho, halani tangan siamunmu sandiri mambere hamonangan bam. [636]

¹⁵Tonggor ma huda Nil, na hujadihon songon panjadihon-Ku bam; poyon-poyon do igagat usih songon lombu.

¹⁶Tonggor ma, ibagas binongeini do hagogohonni, anjaha ibagas urat-urat ni boltokni do habetengonni.

¹⁷Boi do ibahen gonggong ihurni songon hayu ares, anjaha mardandan do urat-urat ni hae-haeni.

¹⁸Songon pipa tombaga do holiholini, anjaha gorini songon balok bosi.

¹⁹Ia do jadi-jadian ni Naibata na parlobei, na jinadihon-Ni gabe raja i tongah-tongah ni hasomanni.

²⁰Dolog do panampalan bani, ianan ni binatang-binatang marguro-guro.

²¹I toruh ni batang ni hayu na marbunga do ia rosuh marlinggom, marponop i tongah-tongah ni arung-arung ampa paya-paya.

²²Batang ni hayu na marbunga do manlinggomisi, anjaha bulung ni tolong do manrungkubsi.

²³Marbanggal pe bah seng gobir ia, totap do uhurni age pe roh bah ansa banggal ni Jordan mandorabsi.

²⁴Ise ma na boi manangkapsi hun lobeini? Barang mannahkon halihir hubagas igungni?

²⁵Tumaram ma boi toguonmu buaya marhitei hail, barang odohkononmu dilahni bani tali? [637]

²⁶Tumaram ma boi halihironmu igungni marhitei hotang, barang tupukonmu huyumni bani hail bosi?

²⁷Tumaram ma ia ninuhurmu ra mambahen pangindoan bam, barang marhata na lamlam bam?

²⁸Tumaram ma ra ia marpadan pakon ho, gelah ra ia lalab jadi jabolonmu?

²⁹Tumaram ma boi parguro-gurohononmu ia songon manuk-manuk, barang tambatkononmu ia bahen guro-guro ni borumu?

³⁰Tumaram ma ra halak pardengke mantiga-tigahonsi? Barang ra ma halak partiga-tiga marbagi ai? [638]

³¹Mangasup do ho manomtomkon lombing hubani hulingkulingni, barang uluni bani pantom-pantom?

³²Lajou ma sahali manangkapsi! Ingat ma parporanganni! Tontu lang be ra ho manlajousi.”