Read Batak Simalungun JOB 41 Bible Online

JOB 41 - Batak Simalungun bible

JOB 41

¹Tonggor ma, labuh do pangarapanmai, mangidahsi pe domma malitonduy ho.

²Ise pe lang na pag mangkeheisi; i lobei-Hu ise na tahan jongjong?

³ise ma na dob mamberehon Bangku, ase hubalas ai bani? Haganup na i toruh ni langit, Ahu do simadasi. [639]

⁴Seng pasipon-Ku pasal pagorini ai, barang gogohni na surung ai, barang potongan ni badanni ai.

⁵Ise ma na ongga mananggali pakeianni? Ise ma na pag manroroh hubagas iponni sidua baris ai?

⁶Ise ma na ongga mambuha osangni ai? Jangin do inggot iponni ai.

⁷Gurungni tarjadi humbani gantar na patitir, marrapat-rapat songon na tinokan.

⁸Rapat do na sada bani na sada nari, logou pe seng siat hun holangkolangni.

⁹Ganup longkot bani na legan, marsirapitan seng hasirangan.

¹⁰Anggo marbarsi ia kaluar sinalsal, anjaha matani songon salibon ni sibalik huning. [640]

¹¹Humbani babahni kaluar rigapan na marjilam-jilam, anjaha abab mandarat hunjai.

¹²Humbani bungbung ni igungni kaluar timus, songon humbani hudon na gurgur, na ginorgoran marhitei ranggas-ranggas.

¹³Hosahni boi pagara arang, anjaha gajag ni apuy kaluar humbani babahni.

¹⁴Marianan do hagogohon bani tangkuhukni, anjaha songgot-songgot mardalan i lobeini.

¹⁵Sibuk ni badanni toguh, songon na tinuang bani, seng tardugur.

¹⁶Mapir do atei-ateini songon batu, mapir tene songon batu ni pandudaan na partoruh.

¹⁷Anggo hehe ia bajoraon do halak na garang, malitonduy halani biarni.

¹⁸Podang pe lang tolap bani, age tanja, gijig-gijig atap anak ni panah pe.

¹⁹Doskon anggala do ietong bosi, anjaha tombaga doskon hayu masik-masik.

²⁰Seng maporus ia bahenon ni anak ni panah, doskon anggala do bani batu ni umbalang.

²¹Doskon hayu ni omei do ihira antuk-antuk, anjaha itatawai do parngingis ni tanja. [641]

²²Boltokni doskon sanga-sanga na marot, anjaha bogasni ibagas hubang doskon bogas ni gareta pardogei.

²³Bah na i toruh gurgur ibahen songon bah na ibagas hudon, anjaha laut ai doskon serek panlompahan ni tambar.

²⁴Limbasni i pudini mirlak-irlak itadingkon, anjaha doskon uban sisik ni bah ai idahon.

²⁵Seng dong usihanni anggo i darat, na tinompa na so marhabiaran do ia.

²⁶Mapas uhurni mangidah sagala na gijang, ia do raja bani sagala binatang panoroh.” [642]