Read Batak Simalungun JOB 42 Bible Online

JOB 42 - Batak Simalungun bible

JOB 42

¹Dob ai nini si Job ma mambalosi Jahowa,

²“Sonari pe ase hubotoh marguru Bamu do ganup, anjaha seng tarlanglangi sura-sura ni uhur-Mu age sada. [643]

³Ise do in, na sihol pagolap uhur ni Naibata, marhitei hata na so marpanimbangion? Halani ai do ase husahapkon na so huarusi, pahara na gok halongangan bangku, na so hubotoh.” [644]

⁴Bogei, sihol marsahap do Ahu, adong do sihol sungkunonku bam, ase ho patorangkon Bangku. [645]

⁵Domma namin hubogei barita pasal Ham, tapi anggo sonari matangku sandiri ma mangidah Ham. [646]

⁶Halani ai jora ma ahu, anjaha husolsoli do diringku hundul ibagas orbuk ampa abuan. [647]

⁷Dobkonsi ihatahon Jahowa hata ai hubani si Job, nini Jahowa ma dompak si Elipas na hun Teman, “Domma gajag ringis-Hu dompak ho ampa dompak huan-kuanmu sidua halak ai; ai lang sintong pangkatahonnima pasal Ahu, songon pangkatahon ni juakjuak-Ku si Job ai. [648]

⁸Halani ai buat hanima ma pitu lombu jonggi ampa pitu biribiri tunggal, anjaha laho ma hanima marayak juakjuak-Ku si Job ai, anjaha galangkon hanima ma bannima galangan situtungon laho manguras dirinima, ase itonggohon juakjuak-Ku si Job hanima, ai ra do Ahu manangihon tonggoni gabe seng honahonon-Ku be bannima domu hubani haotoon na binahennima ai, ai lang sintong pangkatahonnima pasal Ahu, songon pangkatahon ni juakjuak-Ku si Job ai.” [649]

⁹Dob ai laho ma si Elipas na hun Teman pakon si Bildad na hun Sua pakon si Sopar na hun Naama, anjaha ibahen sidea ma romban hubani hata ni Jahowa na bani sidea; anjaha itangihon Jahowa do tonggo ni si Job ai.

¹⁰Dob ai ipasuang Jahowa ma hadoharon ni si Job, sanggah na martonggo ai ia mangapiti huan-kuanni ai, anjaha dua lompit ma ganda ipasuang Naibata hubani si Job sagala na dong bani hinan. [650]

¹¹Dob ai roh bei ma sagala saninani, botouni ampa haganup na manandasi hinan, lanjar mangan rapkonsi ibagas rumahni; ipataridahkon sidea ma banggal ni uhur ni sidea bani, anjaha iapoh sidea ma ia pasal haganup hinamagou na pinasogop ni Jahowa bani; anjaha ganup sidea mambere bani sada duit kesita ampa sada bei tintin omas. [651]

¹²Dob ai ipasu-pasu Jahowa ma si Job lobih humbani mungkahni hinan, gabe adong ma bani sapuluh ompat ribu biribiri, onom ribu unta, saribu pasang horbou ampa saribu halodeni boru-boru. [652]

¹³Tubuh ma use pitu anakni ampa tolu boruni.

¹⁴Goran ni boruni sikahanan ai ma si Jemima, goran ni paidua si Kesia, goran ni paitolu si Kerenhapuk.

¹⁵Bani sab nagori ai, seng dong jumpah naboru songon hinajenges ni boru ni si Job ai; ibere si Job do parbagianan bani sidea songon na bani botou ni sidea. [653]

¹⁶Dob ai manggoluh ope si Job ai saratus ompat puluh tahun nari; sompat ope ididah anakni ampa pahompuni ompat sundut. [654]

¹⁷Dob ai matei sayur matua ma si Job dob sombuh iahap bani hagoluhan on. [655]