Read Batak Simalungun JOB 6 Bible Online

JOB 6 - Batak Simalungun bible

JOB 6

¹Dob ai nini si Job ma mambalosi,

²“Ah, ambit tangkas ma namin itimbang pusok ni uhurhu, anjaha ganup sitarononku itibalhon bani timbangan! [79]

³Ra boratan ma ai nuan humbani horsik na i topi ni laut, halani ai do ase lepak-lepak parsahapku.

⁴Ai marpantikan do bangku panah ni Pargogoh Na So Tarimbang in, ionsop tonduyhu do bisani; songgot-songgot ni Jahowa marodor manunsahi ahu. [80]

⁵Tumaram ma marlingik halode harangan anggo sungkup do poyon-poyon sampalonni? Barang marumboh lombu anggo sungkup do gagatonni?

⁶Mintor tarpangan ma na so mardai lang pala margaram? barang mardai do silopak ni tolur?

⁷Magigi do ahu manjamah ai; songon sipanganon na maginei do ai bangku.

⁸Ah, sai jumpah ma namin na hupindo, anjaha ibere Naibata ma namin sura-surangku.

⁹Ambit marosuh ma namin uhur ni Naibata manropuki ahu, anjaha idurdurhon tangan-Ni manrotapkon hosahku!

¹⁰Na boi gabe apoh-apoh bangku, anjaha marolob-olob ope ahu ibagas na maborit na so maralang-alang, ai ma, halani seng huparnalang hata ni Na Mapansing in.

¹¹Ai aha ope gogohku, ase mangarap ope ahu? Anjaha aha ope siarapkononku, ase boi marsabar ni uhur ahu?

¹²Ai doskon gogoh ni batu gogohku, barang tombaga angkulangku?

¹³Tongon, seng dong be pangurupion bangku, anjaha na boi haluahon bangku domma mandaoh humbangku.

¹⁴Halak na lang padalan holong atei bani hasomanni, ai ma na manalduskon biar dompak Pargogoh Na So Tarimbang in.

¹⁵Seng hatengeran saninangku, ai songon bah etek, songon bah na marbanggal do sidea, [81]

¹⁶bah na gombur ibahen es, anjaha salju mabaor malala hubagas;

¹⁷na marsik sanggah logo ni ari, anjaha anggo milas ari horah do iananni. [82]

¹⁸Marlegot-legot do pardalanni, laho hu halimisan, lanjar magou.

¹⁹Manatap-natap do kafilah na hun Tema dompak jai, anjaha saudagar na hun Seba mangarap hunjai. [83]

²⁰Hiranan do sidea bani pangarapan ni sidea ai, roh sidea hujai, gabe tarbador do sidea.

²¹Usih hujai do hanima nuan bangku, ididah hanimahonsi otik na majangin mabiar ma hanima.

²²Ongga huhatahon, ʻBere otik bangku?ʼ Barang, ʻBoan hanima siluah bangku humbani artanima?ʼ

²³Barang, ʻPaluah ma ahu humbani tangan ni sipanunsahi?ʼ Barang, ʻTobus ma ahu humbani tangan ni sipangunsagahkon gogoh?ʼ

²⁴Ajari hanima ma ahu, ase sip ahu; patugah hanima bangku, ija ahu kahou.

²⁵Margogoh tumang do hata hasintongan. Tapi aha ma arti ni hutuk-hutuknima in? [84]

²⁶Ai na sihol maminsang parsahapan do uhurnima? Doskon logou do hiraon sahap ni sada halak na marpandoleian? [85]

²⁷Dakdanak na tading maetek pe ra do hanima marruji-rujihon, sonai homa manjualhon hasomannima pe.

²⁸Ai pe, dompakkon hanima ma ahu; ai seng ra ahu marladung i lobeinima.

²⁹Parimbagaskon hanima ma, ulang masa na so pintor. Nai ma, parimbagaskon hanima ma, totap do hapintoronku.

³⁰Ai adong na lepak bani dilahku? Mintor seng ma nani ibotoh pamanganku mangahap na ija na salah?” [86]