Read Batak Simalungun JOB 7 Bible Online

JOB 7 - Batak Simalungun bible

JOB 7

¹“Ai lang borat do horja ni jolma i tanoh on, anjaha lang songon ari-ari ni sada halak gajian do ari-arini? [87]

²Songon jabolon na mangindo marlinggom-linggom, songon sada gajian na paima-imahon gajini,

³sonai do itontuhon bangku bulan hamagouan, anjaha borngin hangaluton do ipasirsir bangku.

⁴Anggo laho modom ahu, ningku do, ʻAntigan pe ahu puho?ʼ Tapi borngin ai pe ngolngol do, loja ahu, marguling-guling ahu das bani na siang ari. [88]

⁵Bingaon anjaha lingkorangan badanku ganup, maripos-ipos hulingkulingku, dob ai malala use.

⁶Podasan do habang ari-aringku ase tuldak, anjaha magou-magou sonin, seng dong siarapkonon. [89]

⁷Ingat ma, sahali tumang do goluhkon; seng idahon ni matangku be na madear. [90]

⁸Panonggor ni na manorih ahu, seng be idahonni ahu, pindahan ni panonggormu ma ahu, hape seng ijin be ahu.

⁹Songon hombun na habang lanjar salpu, sonai do halak turun hu nagori toruh, seng tarbahensi tangkog be hunjai.

¹⁰Seng anjai mulak be ia hu rumahni, seng itandai iananni be ia. [91]

¹¹Ai ma ase seng tartutup ahu pamanganku, marsahap uhurhu halani hasosakan ni uhurhu, tangis uhurhu halani hasosakan ni tonduyhu.

¹²Ai laut ahu barang naga, ase ibahen Ham na marjaga ahu?

¹³Anggo ihatahon uhurhu, ʻApeihu ma na mangapoh ahu, podomanku pahampung orong-orongku,ʼ

¹⁴jadi isonggoti Ham do ahu marhitei nipi, anjaha mabiar ahu ibahen marhitei panonggoran,

¹⁵gabe dearan huahap mandolos, dearan matei ase paboan-boan sitaronon on.

¹⁶Domma sobalan ahu, seng sihol be ahu manggoluh lalab; paluah ma ahu, ai doskon sahali marhosah do ari-aringku. [92]

¹⁷Ai aha ma namin jolma in, ase pala patimbulon-Mu ia, anjaha pardiateihonon-Mu ia? [93]

¹⁸Iparayak Ham do ia ganup sogod, anjaha ganup tongkin ilajou Ham ia. [94]

¹⁹Sadiha dokah on, ase padaohon-Mu panonggor-Mu humbangku, anjaha paluahon-Mu ahu, ase sompat ahu mamondut tijurhu? [95]

²⁰Anggo mardousa ahu, aha ma tarbahen ahu dompak Ham, alo Sijaga manisia? Mase ma ahu ibahen Ham gabe sitembakonmu? Mase ma gabe siporsanon ahu, Bamu?

²¹Mase ma lang isasap Ham panlanggaronku, anjaha ibuat Ham hajahatonku? Ai laho modom ma ahu hubagas tanoh; pindahanmu ma ahu, tapi lang ijin be ahu.”