Read Batak Simalungun PSALMEN 1 Bible Online

PSALMEN 1 - Batak Simalungun bible

PSALMEN 1

¹Martuah ma halak na so ra mangihutkon riah ni halak parjahat, na so ra jongjong bani dalan ni pardousa, anjaha na so ra hundul bani tumpuan ni halak siparrisai. [1]

²Tapi titah ni Jahowa do harosuh ni uhurni, sai titah-Ni ai do ipingkiri arian pakon borngin. [2]

³Songon hayu do ia na sinuan i topi ni bah mardalan, na marbuah bani musimni, bulungni pe seng ra melus, anjaha sagala hinorjahonni manjadi do. [3]

⁴Seng sonai anggo halak parjahat, tapi songon lapa-lapa hinabangkon ni logou do sidea. [4]

⁵Halani ai seng tahan halak parjahat i lobei ni paruhuman, sonai homa pardousa ibagas humpulan ni halak parpintor. [5]

⁶Ai itanda Jahowa do dalan ni halak parpintor, tapi sai maseda do dalan ni halak parjahat. [6]