Read Batak Simalungun PSALMEN 10 Bible Online

PSALMEN 10 - Batak Simalungun bible

PSALMEN 10

¹Mase mandaoh-daoh Ham jongjong, ale Jahowa, marponop Ham bani panorang hasosakanku? [98]

²Halani enjeng ni parjahat, pusok do iahap na masombuh. Sai tardapot ma sidea bani hajahaton na niranggini ai.

³Ai ihamogahkon parjahat do sura-sura ni uhurni, ipuji-ipuji untungni, anjaha iapasi Jahowa. [99]

⁴Nini parjahat do marhasoman pangunsong ni igungni, “Seng anjai marlulu Ia, seng dong Naibata,” sonai do pingkiranni. [100]

⁵Manjadi do sagala langkahni tongtong; magijangtu do humbani uhuman-Mu; iunsongkon igungni dompak imbangni. [101]

⁶Nini ibagas uhurni, “Seng anjai morot ahu, seng anjai mangonai bangku hasunsahan marsundut-sundut.” [102]

⁷Gok do bura-bura pakon sipaoto-oto ampa panokohon pamanganni; hagedukon pakon hajahaton do i toruh ni dilahni. [103]

⁸Sai manggompangi do ia bani huta-huta; bani ianan na ponop ibunuhi halak na so marpipot, matani mangkahapi halak na galek. [104]

⁹Marponop do ia manggompangi songon singa ibagas naporon, manggompangi ia laho manangkap halak na masombuh. Itangkap do halak na masombuh laho pamasukkonsi hubagas sidingni. [105]

¹⁰Ipaunduk do dirini mardalan, jadi dapot sisilonni na gogoh ai ma halak na galek.

¹¹Nini ibagas uhurni, “Ihalupahon Naibata do ai, iponopkon bohi-Ni, seng anjai idahon-Ni ai ronsi sadokah ni dokahni.” [106]

¹²Jongjong ma Ham Jahowa, ale Naibatangku, surdukkon Ham ma tangan-Mu, ulang ma lupa Ham bani halak na masombuh! [107]

¹³Mase ma mapas parjahat bani Naibata, anjaha nini ibagas uhurni, “Seng anjai luluhonon-Ni ai?” [108]

¹⁴ididah Ham do ai tene, itatap Ham do halojaon pakon hasunsahan laho manangani ai. Bamu do marondos halak na galek, Ham do panolong bani halak na tading maetek. [109]

¹⁵Ponggolhon Ham ma botohon ni halak parjahat pakon halak na jungkat, balaskon Ham ma hajahatonni, ase ulang adong be ia. [110]

¹⁶Jahowa do raja sadokah ni dokahni; magou do sipajuh begu-begu humbani tanoh-Ni. [111]

¹⁷Domma itangihon Ham Jahowa pangindoan ni uhur ni halak na masombuh, ipatotap Ham do uhur ni sidea, anjaha ipatiur Ham do pinggol-Mu, [112]

¹⁸laho pasintong uhum bani halak na tading maetek pakon na nidorun, ase ulang inunut jolma na i tanoh on mambibiari. [113]