Read Batak Simalungun PSALMEN 102 Bible Online

PSALMEN 102 - Batak Simalungun bible

PSALMEN 102

¹Tonggo ni sada halak na madoyuk ibagas hagelokkonni, anjaha iuseihon tangisni ai i lobei ni Jahowa. [1253]

²Ham Jahowa, tangihon ham ma tonggongku, sai das ma Bamu dilo-dilongku. [1254]

³Ulang lingodkon Ham bohi-Mu humbangku sanggah hasosakanku. Paeleng Ham ma pinggol-Mu hu bangku; sanggah hudilo Ham, balosi Ham ma ahu podas.

⁴Ai magou do ari-ari ni goluhku songon timus, anjaha gara do holi-holingku songon parapuyan. [1255]

⁵Mosog do pusu-pusungku anjaha melus songon poyon-poyon, gabe lupa ahu mangan sipanganonku. [1256]

⁶Halani gogoh ni pangorongku, longkot do holi-holingku bani hulingkulingku. [1257]

⁷Songon onggang na i halimisan ahu, songon langkupa i tongah-tongah ni na mareong. [1258]

⁸Seng ra tarpodom ahu, songon manuk-manuk na punjung bani tayub do ahu.

⁹Manipat ari do ahu irisai munsuhku, halak na manggila dompak ahu, mamapai marhitei goranku.

¹⁰Hupangan do abuan songon ruti, anjaha husaorhon do iluhku bani siinumonku. [1259]

¹¹halani ringis-Mu pakon gila-Mu; iangkat Ham do ahu, dob ai iambalhon Ham. [1260]

¹²Songon halinoh na manabad do goluhku, anjaha melus do ahu songon poyon-poyon. [1261]

¹³Tapi anggo Ham Jahowa, sadokah ni dokahni do marparatas, anjaha goran-Mu tardingat do marsundut-sundut.

¹⁴Jongjongkon Ham ma, maidop ma uhur-Mu bani Sion, ai domma jumpah panorangni mangkaholongisi, tongon, domma das panorang na binuhul hinan. [1262]

¹⁵Ai holong do uhur ni juakjuak-Mu bani batuni, anjaha pusok uhurni mangidah parreongni.

¹⁶Jadi habiaran ni bangsa parbegu ma use goran ni Jahowa, ampa raja-raja na i tanoh on hamuliaon-Mu,

¹⁷anggo ipajongjong Jahowa ma use Sion, ipataridahkon diri-Ni ibagas hamuliaon-Ni;

¹⁸idompakkon diri-Ni bani tonggo ni halak na so mardiha-diha, anjaha seng mapas uhur-Ni bani elek-elek ni sidea. [1263]

¹⁹Suratkon ma ai bani sundut na roh, anjaha bangsa na sihol jadi ope, pujion ni ma Jahowa, [1264]

²⁰halani marpanatap do Ia dompak toruh humbani ianan na ma pansing na gijang ai, marpanatap Jahowa hun nagori atas hu tanoh on, [1265]

²¹laho manangihon hoih-hoih na tartutup, laho paluahkon halak na dob ondos hu hamatean, [1266]

²²ase ibaritahon halak goran ni Jahowa i Sion ampa puji-pujian-Ni i Jerusalem,

²³bani na martumpu ijai bangsa-bangsa ampa harajaon laho mambalosi Jahowa. [1267]

²⁴Ia do na mamonggolhon gogohku i tongah dalan, anjaha ipapondok do ari-aringku. [1268]

²⁵Ningku, “Ham Naibatangku, ulang alop Ham ahu bani partongahan ni goluhku, Ham pargoluh na marsundut-sundut. [1269]

²⁶Sapari Ham do na pajonamkon tanoh on, anjaha jadi-jadian ni tangan-Mu do sagala langit. [1270]

²⁷Haganupan ai laho salpu do, tapi totap do anggo Ham; laho buruk do ai haganup songon hiou, songon sabei-sabei igantih Ham sidea, jadi masab ma sidea. [1271]

²⁸Tapi anggo Ham totap do, seng marpunsa tahun-Mu.

²⁹Sai sonang do marianan ginompar ni juakjuak-Mu, anjaha totap do i lobei-Mu ginompar ni sidea.” [1272]