Read Batak Simalungun PSALMEN 103 Bible Online

PSALMEN 103 - Batak Simalungun bible

PSALMEN 103

¹ Humbani si Daud. Puji ma Jahowa, ale tonduyhu, anjaha humbani gok ni uhurhu mamuji goran-Ni na pansing in! [1273]

² Puji ma Jahowa, ale tonduyhu, anjaha ulang ma halupahon ganup dear layak-Ni!

³ Ia do na manasap sagala dousamu, anjaha na pamalumkon sagala naboritmu; [1274]

⁴ na paluahkon goluhmu humbani hamagouan, na mansortalihon bam dear layak ampa idop ni uhur, [1275]

⁵na pabosurhon sura-suramu marhitei na madear, ase mulak bayu haposoonmu songon manuk-manuk nanggordaha. [1276]

⁶Jahowa, na mambahen hapintoron, anjaha na pasintongkon uhum bani halak na hona dorun,

⁷Ia do na pabotohkon dalan-Ni bani si Musa, hubani anak ni Israel pambahenan-Ni. [1277]

⁸ Paridop ni uhur anjaha pardear layak do Jahowa, nanget manringis anjaha paridop ni uhur banggal. [1278]

⁹Seng torus Ia manggila, anjaha seng marah Ia ronsi sadokah ni dokahni. [1279]

¹⁰ Seng ibahen hu banta romban hubani dousanta, anjaha seng ibalaskon banta romban hubani hajahatonta.

¹¹ Tapi songon gijang ni langit hun tanoh on, sonai do banggal ni idop ni uhur-Ni bani sagala na mangkabiari-Si. [1280]

¹² Songon daoh ni hapoltakan humbani hasundutan, sonai do ipadaoh panlanggaronta hun banta.

¹³ Songon idop ni uhur ni bapa bani niombahni, sonai do idop ni uhur ni Jahowa bani sagala na mangkabiari-Si.

¹⁴Ai ibotoh do sonaha tompanta, idingat do, orbuk do anggo hita. [1281]

¹⁵Ia jolma in, songon poyon-poyon do, marbunga do ia songon bunga na i talun; [1282]

¹⁶montas honsi logou seng dong be ia, anjaha seng natandai be iananni.

¹⁷Tapi anggo idop ni uhur ni Jahowa totap do ronsi sadokah ni dokahni bani sagala na mangkabiari-Si, anjaha hasintongan-Ni marnini marnono, [1283]

¹⁸bani na manramotkon padan binahen-Ni, pakon na mardingat parentah-Ni laho mandalankon ai. [1284]

¹⁹Domma ipajonam Jahowa paratas-Ni i surga, anjaha panggomgomion-Ni manrajai haganup. [1285]

²⁰Puji ma Jahowa, nasiam sagala malekat-Ni, nasiam, sagala puanglima na margogoh, sipasaud hata-Ni! [1286]

²¹Puji ma Jahowa, nasiam sagala bala-Ni, nasiam sagala siparugas Bani, sipasaud harosuh ni uhur-Ni!

²²Puji ma Jahowa, ale jadi-jadian-Ni, bani ganup ianan ni harajaon-Ni! Puji ma Jahowa, ale tonduyhu! [1287]