Read Batak Simalungun PSALMEN 104 Bible Online

PSALMEN 104 - Batak Simalungun bible

PSALMEN 104

¹Puji ma Jahowa, ale tonduyhu! Ham Jahowa Naibatangku, banggal tumang do Ham, hasangapon pakon hamuliaon do pakeian Bamu. [1288]

²Haliharon do isabingkon Ham Bamu songon salimut, ipaherbang Ham do langit songon tenda. [1289]

³Ibahen Ham do loteng-Mu i babou ni bah, hombun do ibahen Ham gareta-Mu, anjaha mardalan-dalan do Ham i atas ni habong ni logou. [1290]

⁴Ibahen Ham do logou gabe suruhan-Mu, apuy na marjilam-jilam gabe siparugas-Mu. [1291]

⁵Domma ipajonam Ham tanoh on bani palasni, seng anjai dugur be sadokah nidokahni. [1292]

⁶Bah bagas na hampar do manrungkubsi, tinob do sagala dolog ibahen bah.

⁷Maporus do ai ibahen pangasupi-Mu, tarolos do sidea lintun ibahen sora ni longgur-Mu; [1293]

⁸gabe timbul ma dolog, matornoh lombang bani ianan na dob tinotapkon-Mu bani sidea.

⁹Domma itotapkon Ham parbolatan bani bah na so malo lopusanni, seng anjai rungkubonni be tanoh. [1294]

¹⁰Ham do na patubuh bah tubuh i lombang-lombang, na mambahen mabaor bahni i holangkolang ni dolog-dolog, [1295]

¹¹na mambere minum sagala binatang na i talun, anjaha halode jalang sombuh horahni ijai;

¹²marasari do i topi ni manuk-manuk na i awang-awang, na patangarhon dodingni hun ranting-ranting.

¹³Ham do na painum dolog humbani loteng-Mu, anjaha bosur do tanoh on marhitei hombun-Mu. [1296]

¹⁴Ham do patubuhkon poyon-poyon bani pinahan, ampa suan-suanan sihorjahonon ni jolma, mambahen mandarat ruti humbagas tanoh, [1297]

¹⁵ampa anggur laho pamalas uhur ni jolma, pakon minak na mambahen marminak bohi pakon ruti na pagogohkon uhur ni jolma. [1298]

¹⁶Bosur do ganup hayu ni Jahowa, hayu ares na i Libanon, na sinuan-Ni ai;

¹⁷ijai do marasari manuk-manuk, tanda ulog marjabu bani tusam.

¹⁸Dolog na gijang do ianan bani bedar, anjaha dolog batu haporusan bani sorigala.

¹⁹Ham do mambahen bulan laho manotapkon panorang, mata ni ari ibotoh do ianan hasundutanni. [1299]

²⁰Ia dongkon Ham do na golap jadi tubuh ma borngin, ai ma panorang mandarat sagala binatang harangan.

²¹Singa ajar-ajar maraum mangindahi sisorohon, ipangindo sipanganonni humbani Naibata. [1300]

²²Anggo poltak ma mata ni ari, mulak bei ma sidea, manggompang ibagas liangni. [1301]

²³Kaluar ma jolma manohu horjani, mandalankon lahoanni ronsi bod ari.

²⁴Buei tumang do jadi-jadian-Mu, Ham Jahowa, haganupan in ipauli Ham marhitei hapentaran, gok do tanoh on bani na tinompa-Mu.

²⁵Tonggor ma, laut na ampar bolag tumang, ijai do gumayom, seng habilangan, binatang-binatang na etek age na banggal.

²⁶Ijai do manjuluri binatang laut na majombut, sonai age Leviatan na jinadihon-Mu, marguro-guro do ijai.

²⁷ Haganup, Bamu do marpangarapan, ase ibere Ham sipanganonni bei bani panorangni. [1302]

²⁸ Anggo ibere Ham bani sidea, boi ma sidea patumpuhon; anggo ibuha Ham tangan-Mu, bosur ma sidea bani na madear.

²⁹Anggo iponopkon Ham bohi-Mu, tarsonggot ma sidea; anggo ibuat Ham hosahni, matei ma sidea, mulak bani orbukni hinan. [1303]

³⁰Anggo itongos Ham Tonduy-Mu, tartompa ma sidea, anjaha bayu ma rupa ni tanoh on ibahen Ham. [1304]

³¹Ronsi sadokah ni dokahni do hamuliaon ni Jahowa, malas do uhur ni Jahowa mangidah jadi-jadian-Ni. [1305]

³²Mangkawah Ia bani tanoh on gabe dugur ma, ijamah dolog gabe martimus ma. [1306]

³³Sai dodingkononku do Jahowa sadokah goluhku, sai dodingkononku do Naibatangku sadokah dong ahu. [1307]

³⁴Sai marosuh ma Ia bani dodingku, marmalas ni uhur do anggo ahu ibagas Jahowa. [1308]

³⁵Sai bois ma sagala pardousa hun tanoh on, anjaha ulang be dong halak parjahat. Puji ma, Jahowa ale tonduyhu! Haleluya! [1309]