Read Batak Simalungun PSALMEN 105 Bible Online

PSALMEN 105 - Batak Simalungun bible

PSALMEN 105

¹Puji nasiam ma Jahowa, dilo ma goran-Ni, pabotohkon nasiam ma pambahenan-Ni i tongah-tongah ni bangsa-bangsa! [1310]

²Dodingkon nasiam ma Ia, dodingkon ma puji-pujian Bani, sahapkon nasiam ma ganup horja halongangan-Ni in.

³Marmogah-mogah ma nasiam ibagas goran-Ni na pansing in; marmalas ni uhur ma sagala sipindahi Jahowa. [1311]

⁴Pindahi nasiam ma Jahowa pakon hagogohon-Ni, pindahi nasiam ma tongtong bohi-Ni. [1312]

⁵Paingat-ingat nasiam ma sagala halongangan na binahen-Ni, tanda halongangan-Ni pakon uhum niluarhon ni pamangan-Ni,

⁶nasiam, ale ginompar ni si Abraham, juakjuak-Ni in, nasiam, ale anak ni si Jakob, na pinilih-Ni in!

⁷Ia Jahowa, Ia do Naibatanta, sab do bani dunia on uhum-Ni.

⁸Idingat do tongtong padan na binahen-Ni, hata na niluarhon-Ni hubani marribu-ribu sundut, [1313]

⁹ai ma padan binahen-Ni bani si Abraham ampa bulawan-Ni bani si Isak.

¹⁰Ipajongjong do ai bani si Jakob gabe aturan, bani Israel gabe padan sadokah ni dokahni;

¹¹nini, “Hu bam do berehonon-Ku tanoh Kanaan; gabe tean-teanan tanoh parbagiananmu.” [1314]

¹²Sanggah seng sadiha ope bilangan ni sidea, otik hansa anjaha panginsolat ijai;

¹³marbungkas-bungkas humbani bangsa hu bangsa, humbani sada harajaon hu harajaon na legan, [1315]

¹⁴seng ibere age sahalak mangarsik sidea, ipapai do tene raja-raja marhalanihon ni sidea: [1316]

¹⁵Nini, “Ulang kahua hanima halak na niminakan-Ku, ulang bahen hanima na jahat bani nabing-Ku.”

¹⁶Sanggah na ipamasa lohei bani tanoh in, anjaha na binolahkon-Ni sagala parbohalan ni sipanganon. [1317]

¹⁷Isuruh ma sada halak parlobei ni sidea, ai ma si Josep na tarjual songon jabolon. [1318]

¹⁸Naheini igari bosi janah borgokni irantai bosi [1319]

¹⁹paima das nidok ni hata-Ni, gabe saud hata ni Jahowa. [1320]

²⁰Isuruh raja ma na paluahkonsi, sirajai bangsa-bangsa mangkatahon paluahon ia; [1321]

²¹ipabangkit ma ia gabe tuan i rumahni, ampa panggomgom bani sagala artani, [1322]

²²laho mangajari gamot-gamotni mangihutkon rosuhni, ampa mamodahkon hauhuron bani pangintuai-pangintuai.

²³Dob ai roh ma Israel hu Masir, manginsolat ma si Jakob i tanoh ni si Ham. [1323]

²⁴Ibahen ma bangsa-Ni ai manggargar tumang, gogohan humbani imbangni. [1324]

²⁵Ipagoling ma uhur ni sidea laho mandomdomi bangsa-Ni, mambahen akal-akal bani juakjuak-Ni.

²⁶Dob ai isuruh ma si Musa, juakjuak-Ni ai, pakon si Aron, na pinilih-Ni ai. [1325]

²⁷Ipamasa sidea ma partanda ni Jahowa i tanoh Masir ampa halongangan i tanoh ni si Ham. [1326]

²⁸Iparoh ma na golap gabe lotir ma, tapi seng iparuhurhon sidea hata-Ni. [1327]

²⁹Ipaubah do bah ni sidea gabe daroh, gabe matei ma sagala dengke ni sidea. [1328]

³⁰Gumayom ma tiktikan i tanoh ni sidea, pala das hu kamar ni raja-raja ni sidea. [1329]

³¹Marsahap ma Ia, jadi marrohan ma siranggang, rongit bani sab nagori ni sidea. [1330]

³²Itongos do bani sidea udan sira-sira, gok jirlam ni apuy do tanoh ni sidea. [1331]

³³Iparseda ma pohon anggur pakon hayu ara ni sidea, marponggolan do hayu bani sab nagori ni sidea.

³⁴Marsahap ma Ia, marrohan ma balang ampa tamponok na so habilangan, [1332]

³⁵jadi ipampangani ma sagala suan-suanan i tanoh ni sidea, iboiskon ma gogoh ni juma ni sidea.

³⁶Ibogbog ma sagala bunga-tubuh i nagori ni sidea, pamungkah ni gogoh ni sidea ganupan. [1333]

³⁷Dob ai iboan ma sidea mandarat marnah omas pakon pirak, seng dong humbani marga ni sidea na targompang. [1334]

³⁸Malas ma uhur ni Masir dob haluar sidea, ai sogop do bani sidea biar mangidah Israel.

³⁹Ipaherbang ma hombun manrongkob bani sidea, sonai apuy laho paliharhon borngin. [1335]

⁴⁰Mangindo sidea, gabe iparoh ma leto, anjaha ipabosur ma sidea mangan ruti na hun nagori atas. [1336]

⁴¹Ibuha ma dolog batu, jadi marbaoran ma bah, mardalan i halimisan songon binanga, [1337]

⁴²halani idingat do hata-Ni na pansing in, ai ma na hubani si Abraham, juakjuak-Ni in. [1338]

⁴³Ipadarat do bangsa-Ni ai ibagas malas ni uhur, na pinilih-Ni ai marhasoman olob-olob. [1339]

⁴⁴Ibere ma bani sidea tanoh ni sipajuh begu-begu [1340]

⁴⁵ase iramotkon sidea aturan-Ni, anjaha iparlahouhon titah-Ni. Haleluya!