Read Batak Simalungun PSALMEN 106 Bible Online

PSALMEN 106 - Batak Simalungun bible

PSALMEN 106

¹ Haleluya! Puji ma Jahowa, ai pardear layak do Ia, anjaha ronsi sadokah ni dokahni do idop ni uhur-Ni. [1341]

²Ise do na boi mambaritahon sagala pambahenan ni Jahowa, anjaha pabogeihon puji-pujian-Ni?

³Martuah ma halak na manramotkon uhum, na mandalankon hapintoron tongtong.

⁴Ingat Ham ma ahu, ale Jahowa, domu hubani pangkaholongi-Mu bani bangsa-Mu, tohu Ham ma ahu rap pakon haluahon na hun Bamu;

⁵ase hupaidah-idah hadearon ni na pinilih-Mu, ase marolob-olob ibagas olob-olob ni bangsa-Mu, anjaha mamuji-muji rap pakon pusaka-Mu.

⁶Domma mardousa hanami songon ompungnami, domma marsalah anjaha domma manjahati hanami. [1342]

⁷Ompungnami i Masir seng iartihon halongangan na binahen-Mu, seng idingat sidea buei ni hinalayak-Mu, tapi manlawan do sidea dompak Sitimbulan in i lambung ni laut arung-arung. [1343]

⁸Tapi ipaluah do sidea halani goran-Ni, laho pabotohkon hagogohon-Ni.

⁹Iporjat do laut arung-arung, gabe horah ma, ipadalan ma sidea humbani luhung ni bah songon na bani halimisan. [1344]

¹⁰Ipaluah do sidea humbani tangan ni halak pardomdom, anjaha itobus sidea humbani tangan ni munsuh.

¹¹Irungkub bah do imbang ni sidea, sahalak pe lang na tading.

¹²Jadi porsaya ma sidea bani hata-Ni, anjaha idodingkon puji-pujian Bani. (2 Mus. 15)

¹³Tapi podas-podas do sidea lupa bani pambehanan-Ni, seng ra sidea marguru bani rosuh-Ni.

¹⁴Isuhun-suhuni sidea do hisap-hisapni i halimisan, anjaha ilajou do Naibata i tanoh dorging. [1345]

¹⁵Ibere do bani sidea na hinarosuhkon ni sidea, tapi ibahen do sobalan tonduy ni sidea.

¹⁶Simburu do sidea bani si Musa i parlampolampoan ai, sonai homa bani si Aron na pinapansing bani Jahowa, [1346]

¹⁷Jadi ipangangang tanoh ma babahni mamondut si Datan, anjaha irungkub humpulan ni si Abiram.

¹⁸Apuy pe gara ma bani hulanan ni sidea, anjaha jirlam ni ai mangankon parjahat ai.

¹⁹Ipauli sidea do sada anak ni lombu i Horeb anjaha isombah sidea ma gana-gana na tinuang ai. (2 Mus. 32)

²⁰Igantihkon sidea do hasangapon ni Naibata, bani gana-gana ni lombu sipangan poyon-poyon.

²¹Lupa do sidea bani Naibata na paluahkon sidea, na mambahen habanggalon i tanoh Masir, [1347]

²²halongangan na i tanoh ni si Ham ai ampa pambahenan na majangin i lambung ni laut arung-arung.

²³Jadi ihatahon Jahowa ma boiskonon sidea, ambit ulang si Musa, pinilih-Ni ai, jongjong mangapiti sidea, pahombun ringis-Ni, ase ulang iboiskon sidea. [1348]

²⁴Itulak uhur ni sidea do tanoh harosuh ai, seng porsaya sidea bani hata-Ni. [1349]

²⁵Marmungut-mungut do sidea ibagas lampolampo ni sidea, seng itangihon sidea sora ni Jahowa.

²⁶Jadi ipatoltol ma tangan-Ni dompak sidea, laho manraseihon sidea i halimisan.

²⁷laho mangamburhon ginompar ni sidea, i tongah-tongah ni sipajuh begu-begu, anjaha mangerap sidea bani nagori-nagori. [1350]

²⁸Ipadohor sidea do dirini bani Baal-Pear, anjaha ipangan sidea do galangan bani na matei. [1351]

²⁹Ipuhoi sidea do ringis ni Jahowa marhitei pambahenanni, jadi sogop ma sampar i tongah-tongah ni sidea.

³⁰Jadi jongjong ma si Pinehas, idalankon ma uhum, gabe sonto ma sampar ai, [1352]

³¹anjaha ihira ma ai gabe hapintoronni, marsundut-sundut ronsi sadokah ni dokahni. [1353]

³²Dob ai ipuhoi sidea do ringis-Ni bani Bah Meriba, gabe mangonai hasedaon bani si Musa halani sidea; [1354]

³³ai sai igitiki sidea do uhurni, gabe tarlopus bibirni marsahap.

³⁴Seng iboiskon sidea sagala bangsa, songon na dob hinatahon ni Jahowa hubani sidea. [1355]

³⁵tapi ipasaor-saor sidea do dirini bani sipajuh begu-begu, anjaha iguruhon do pambahenan ni sidea.

³⁶Ibalosi sidea do sisombahon ni sidea, ai ma gabe siding bani sidea. [1356]

³⁷Igalangkon sidea do anak ni sidea pakon boru ni sidea, bani setan-setan. [1357]

³⁸Iduruskon sidea do daroh na so marpipot, ai ma daroh ni anak pakon boru ni sidea, ginalangkon ni sidea bani sisombahon ni halak Kanaan, gabe mabutak tanoh in ibahen sapata ni daroh.

³⁹Ipabutak sidea do dirini marhitei parlahouni, gabe marbangkis sidea marhitei horjani.

⁴⁰Jadi gara ma ringis ni Jahowa dompak bangsa-Ni, gabe magigi Ia bani pusaka-Ni.

⁴¹Iondoskon ma sidea hu tangan ni sipajuh begu-begu, gabe halak na mandomdomi sidea ma manggomgomi sidea. [1358]

⁴²Iodoh-odoh munsuh ni sidea ma sidea, gabe tunduk ma sidea hu toruh ni tanganni.

⁴³Gati tumang do ipaluah sidea, tapi sai ilawan sidea do rosuh-Ni, gabe mogap halani hajahatonni.

⁴⁴Tapi itatap Jahowa do hasosakan ni sidea, sanggah na itangar doruh-doruh ni sidea.

⁴⁵Idingat ma padan-Ni na bani sidea, anjaha isolsoli uhur-Ni domu hubani banggal ni idop ni uhur-Ni.

⁴⁶Jadi dapotan idop ni uhur ma sidea ibahen, humbani halak na manaban sidea.

⁴⁷Paluah Ham ma hanami, ale Jahowa, Naibatanami, pahumpul Ham ma hanami humbani sipajuh begu-begu, ase martarima kasih hanami bani goran-Mu na pansing in, anjaha marmegah-megah hanami mamuji Ham. [1359]

⁴⁸Na puji ma Jahowa, Naibata ni Israel, humbani sadokah ni dokahni ronsi sadokah ni dokahni, anjaha haganup ma bangsa mangkatahon, “Amen! Haleluya!” [1360]