Read Batak Simalungun PSALMEN 107 Bible Online

PSALMEN 107 - Batak Simalungun bible

PSALMEN 107

¹Puji ma Jahowa, ai pardear layak do Ia; tongon ronsi sadokah ni dokahni do idop ni uhur-Ni. [1361]

²Sonai ma sihatahononkon ni halak na pinaluah ni Jahowa, na pinaluah-Ni humbani odoh-odoh ni hasosakan,

³na pinahumpul-Ni humbani sagala nagori, hun hapoltakan pakon hun hasundutan, hun utara pakon hun dangsina.

⁴Sidea na mawat-awat i halimisan, bani ianan na lungun, na seng dapotan dalan hu huta siiankonon,

⁵na horahan loheian, pala madotei uhurni ibagas,

⁶tapi na dilo-dilo bani Jahowa ibagas hasosakanni, gabe ipaluah sidea humbani harusakan ni sidea, [1362]

⁷ibobahon sidea bani dalan na pintor, ase das sidea bani huta siianonkon.

⁸Ningon pujion ni sidea do Jahowa, halani idop ni uhur-Ni ampa halongangan na binahen-Ni bani anak ni jolma, [1363]

⁹halani ipasombuh do tonduy na horahan, anjaha ipabosur tonduy na loheian bani na madear. [1364]

¹⁰Sidea na hundul bani na golap ampa na golap marimpot-impot, na hona gari bani hamarsikon ampa bosi,

¹¹halani ilanggar sidea hata ni Naibata, anjaha mapas bani podah ni Sitimbulan in,

¹²gabe ipatoruh uhur ni sidea marhitei halojaon, mangkatargompang sidea seng dong na mangurupi,

¹³tapi na dilo-dilo bani Jahowa ibagas hasosakanni, gabe ipaluah sidea humbani harusakon ni sidea, [1365]

¹⁴ipadarat sidea humbani na golap marimpot-impot, anjaha irotapi gari ni sidea.

¹⁵Ningon pujion ni sidea do Jahowa, halani idop ni uhur-Ni ampa halongangan na binahen-Ni bani anak ni jolma, [1366]

¹⁶halani na dob pinarseda-Ni ai horbangan tombaga anjaha irosaki oruk-oruk bosi. [1367]

¹⁷Sidea na marsik halani parlahouni na masambor, anjaha hona bogbogan halani hajahatonni,

¹⁸na mangkagigihon sagala sipanganon, pala domma das bani horbangan ni hamatean,

¹⁹tapi na dilo-dilo bani Jahowa ibagas hasosakanni, gabe ipaluah sidea humbani harusakon ni sidea. [1368]

²⁰itongos hata-Ni anjaha ipamalun sidea, ipaluah sidea humbani tanoman.

²¹Ningon pujion ni sidea do Jahowa, halani idop ni uhur-Ni ampa halongangan na binahen-Ni bani anak ni jolma, [1369]

²²ningon galangkonon ni sidea do galangan puji-pujian, anjaha baritahononni pambahenan-Ni ai marhitei olob-olob. [1370]

²³Sidea na markapal i laut, na marboniaga mandipari bah bolag,

²⁴na mangidah jadi-jadian ni Jahowa, ampa halongangan na binahen-Ni ibagas laut,

²⁵marsahap ma Ia, gabe roh ma logou haba-haba, marbanggal gilumbang;

²⁶naik sidea songon na hu langit, turun use hu toruh, hu na bagas, magou uhurni halani hasosakan,

²⁷mirdong sidea anjaha rebad-rebad songon halak na mabuk, magou haganup hapandeian ni sidea,

²⁸tapi na dilo-dilo bani Jahowa ibagas hasosakanni, gabe ipaluah sidea humbani harusakon ni sidea, [1371]

²⁹ipasoh ma haba-haba ai gabe sonang, minop homa pakon gilumbang. [1372]

³⁰gabe marmalas ni uhur sidea halani na minop ai, anjaha iboban sidea das bani labuhan na sinintani.

³¹Ningon pujion ni sidea do Jahowa, halani idop ni uhur-Ni ampa halongangan na binahen-Ni bani anak ni jolma, [1373]

³²ningon patimbulon ni sidea Ia i tongah-tongah ni tumpuan ni bangsa in, anjaha maningon pujion do Ia bani harungguan ni pangintuai-pangintuai.

³³Ia do na paubahkon bah mardalan gabe halimisan, pakon tanoh na gokan bah gabe tanoh dorging;

³⁴tanoh na lambutan gabe tanoh garam, halani hajahaton ni halak na marianan ijai. [1374]

³⁵Ia do na paubahkon halimisan gabe tao, tanoh dorging gabe hatubuhan ni bah. [1375]

³⁶Ibahen do ijai marianan halak na loheian, anjaha ijai ma itombei sidea huta siiankonon ni sidea.

³⁷Isuani sidea ma juma anjaha ipungkah pohon anggur, na mambere ganup tahun gogohni.

³⁸Ipasu-pasu do sidea manggargar, anjaha pinahanni seng hurang ibahen.

³⁹Tapi lambin moru ma sidea anjaha roh toruhni, halani pandorunon, sitaronon pakon hasombuhon.

⁴⁰Ia na parohkon hahirion bani halak na sangap-sangap, Ia do pakahou sidea bani halimisan na so dong dalan. [1376]

⁴¹Tapi halak na sombuh ipagijang do humbani hadoyukon, anjaha ipabuei do ginompar ni sidea marhulan-hulan.

⁴²ididah halak parpintor ma ai gabe marmalas ni uhur, tapi sagala sihorjahon hajahaton itutup bei ma babahni. [1377]

⁴³Barang ise na pantas maruhur, iparimbagaskon ma ai, anjaha iparuhurhon ma pangidopi ni Jahowa. [1378]