Read Batak Simalungun PSALMEN 108 Bible Online

PSALMEN 108 - Batak Simalungun bible

PSALMEN 108

¹Sada doding. Psalm humbani si Daud.

²Sirsir do uhurhu, Ham Naibata, sihol do ahu mandoding, Sihol do ahu mamuji-muji. Puho ma ale tonduyhu, [1379]

³puho ma ale arbap pakon husapi, sihol puhoanku do buha siang ari.

⁴Sihol pujionku do Ham, ale Jahowa, i tongah-tongah ni bangsa-bangsa, sihol dodingkononku do Ham i tongah-tongah ni marga-marga.

⁵Ai gijangan do marimbang langit idop ni uhur-Mu, anjaha hasintongan-Mu das do ronsi hombun.

⁶Patimbul Ham ma diri-Mu mangatasi langit, Ham Naibata, anjaha hu sab tanoh on hamuliaon-Mu, [1380]

⁷ase maluah halak na hinaholongan-Mu. Paluah Ham ma marhitei tangan siamun-Mu, anjaha balosi Ham ma ahu.

⁸Domma marsahap Naibata ibagas rumah-Ni na ma pansing: Sihol do Ahu marsurak-surak, sihol do bagion-Ku Sikem, anjaha pamah Sukot sibaron-Ku.

⁹Ahu do simada Gilead, Ahu do simada Manase; Efraim ai ma tangkuluk bani ulung-Ku, anjaha Juda tungkot ni harajaon-Ku.

¹⁰Moab ai ma mangkuk parburihan-Ku, hu Edom husampakkon sipatung-Ku, marsurak hamonangan do Ahu pasal Palistim.

¹¹Ise do nani mambobai ahu hu huta na toguh ai? Ise do manaruhkon ahu das hu Edom?

¹²Ai lang Ham do, ale Naibata, na dob manulak hanami, anjaha lang ra Ham luar, ale Naibata, mangkasomani hanami?

¹³Bere Ham ma pangurupion bennami, dompak imbangnami, ai soya-soya do pangurupi ni jolma.

¹⁴Marhasoman Naibata tardalankon hita do horja habanggalon, anjaha Ia sandiri do manrojati imbangta.