Read Batak Simalungun PSALMEN 109 Bible Online

PSALMEN 109 - Batak Simalungun bible

PSALMEN 109

¹Bani pambobai koor. Humbani si Daud. Sada Psalm. Ham Naibata, sipujionku, ulang ma sip Ham! [1381]

²Ai ngangang do dompak ahu babah ni parjahat pakon panipu, marsahap do sidea dompak ahu marhasoman dilah siparladung.

³Marhitei hata domdom iinggoti sidea ahu, anjaha iporangi sidea do ahu seng marhala. [1382]

⁴Balos ni holong ni uhurhu iaduhon sidea do ahu, tapi anggo ahu sai martonggo do. [1383]

⁵Ihonahon sidea do bangku hajahaton balos ni na madear, anjaha domdom balos ni pangkaholongingku. [1384]

⁶Pahehe Ham ma parjahat dompaksi, anjaha halak sipanukas jongjong i siamunni. [1385]

⁷Bani na iuhumi ia, sai luar ma ia songon parjahat, anjaha tonggoni sai gabe dousa ma. [1386]

⁸Sai roh otikni ma umurni, anjaha halak na legan ma mambuat pangkatni. [1387]

⁹Sai tading maetek ma niombahni, anjaha mabalu ma jolmani. [1388]

¹⁰Sai mambur merap ma niombahni gabe sipangindo-indo, daoh sirang humbani rumahni na dob pinarreong. [1389]

¹¹Sai ihabus sipabungahon duit ma sagala na dong bani, anjaha halak na legan mangayob na hinalojahonni.

¹²Sai ulang ma dong na marholong ni atei bani, sai ulang ma dong na maridop ni uhur bani niombahni na tading maetek.

¹³Sai ripas ma ginomparni, anjaha sai sasap ma goranni bani sundut na mangihut. [1390]

¹⁴Sai taringat ma dousa ni na lobeini bani Jahowa, anjaha ulang ma hona sasap dousa ni inangni. [1391]

¹⁵Tongtong ma ai i lobei ni panonggor ni Jahowa, anjaha masab ma hun tanoh on pardingatan pasalsi, [1392]

¹⁶halani lang idingat mambahen idop ni uhur, tapi ipardakdak do halak na madoyuk pakon na masombuh, sonai age paruhur na madotei sihol mambunuh sidea. [1393]

¹⁷Holong do uhurni bani bura-bura, sai mangonai ma ai hu bani; seng marosuh ia mamasu-masu, sai daoh ma ai hun bani.

¹⁸Marpakeian bura-bura do ia, sai itorusi ma ia songon bah, anjaha songon minak hubagas holi-holini; [1394]

¹⁹sai songon sabing na sinabingkon ma ai bani, anjaha songon gondit na tongtong longkot bani binongeini.

²⁰Ai ma namin upah humbani Jahowa hubani sagala na manlawan ahu, pakon humbani parsahap na masambor dompak ahu.

²¹Tapi anggo Ham, ale Jahowa, Tuhanku, apiti Ham ma ahu halani goran-Mu! Paluah Ham ma ahu, romban hubani idop ni uhur-Mu.

²²Ai doyuk anjaha masombuh do ahu, anjaha uhurhu maborit do ibagas. [1395]

²³Magou do ahu songon halinoh bani panorangni marganjang, anjaha ipirpirhon do ahu songon balang. [1396]

²⁴Reod-reod do towodku halani marpuasa, merung do dagingku seng martaboh.

²⁵Siapas-apason mando ahu bani sidea, mangidah ahu, iupir-upirhon do uluni. [1397]

²⁶Urupi Ham ma ahu, Ham Jahowa Naibatangku, paluah Ham ma ahu romban hubani idop ni uhur-Mu,

²⁷ase ibotoh sidea tangan-Mu do in, Ham, Jahowa, do sibahen in.

²⁸Mamurai do sidea, tapi Ham do na mamasu-masu. Sai bador ma sidea na manlawan ahu, tapi marmalas ni uhur ma anggo juakjuak-Mu on. [1398]

²⁹Sai marpakeian hahirion ma sagala na manukas-nukasi ahu, anjaha habadoron ma manrungkub sidea songon salimut. [1399]

³⁰Sai sihol do pujionku Jahowa marhitei pamanganku, anjaha pujionku ma Ia i tongah-tongah ni halak na mabuei. [1400]

³¹Ai Ia do na jongjong i siamun ni halak na masombuh, laho paluahkonsi humbani halak na manguhum hosahni. [1401]