Read Batak Simalungun PSALMEN 111 Bible Online

PSALMEN 111 - Batak Simalungun bible

PSALMEN 111

¹Haleluya! Pujionku do Jahowa humbani gok ni uhurhu, i lolouan ni halak parpintor ampa bani partumpuan.

²Banggal do pambahenan ni Jahowa, patut sidingaton ni sagala na mangkarosuhkon-Si. [1409]

³Hamuliaon pakon hasangapon do pambahenan-Ni, anjaha hapintoron-Ni totap do ronsi sadokah ni dokahni.

⁴Ipajongjong do pardingatan bani halongangan-Ni; paridop ni uhur anjaha pardear layak do Jahowa. [1410]

⁵Ibere do sipanganon bani na mangkabiari-Si, idingat do padan na binahen-Ni ronsi sadokah ni dokahni. [1411]

⁶Hagogohan ni pambahenan-Ni ipatugah do bani bangsa-Ni, marhitei na mambere bani sidea pusaka ni sipajuh begu-begu. [1412]

⁷Hasintongan pakon hapintoron do pambahenan ni tangan-Ni, tarhatengerhon do sagala titah-Ni;

⁸totap do ai ronsi sadokah ni dokahni, sidalankonon ibagas hasintongan ampa hapintoron.

⁹Domma itongos haluahon bani bangsa-Ni, ipatotap do padan-Ni ronsi sadokah ni dokahni, na pansing janah majombut do goran-Ni. [1413]

¹⁰ Biar mangidah Jahowa do parmulaan ni hauhuron, dapotan pangarusion na madear do sagala na mandalankonsi; totap do barita-Ni ronsi sadokah ni dokahni. [1414]