Read Batak Simalungun PSALMEN 112 Bible Online

PSALMEN 112 - Batak Simalungun bible

PSALMEN 112

¹Haleluya! Martuah ma halak na marhabiaran bani Jahowa, na marosuh tumang bani titah-Ni. [1415]

²Markuasa do ginomparni i tanoh on, dapotan pasu-pasu do sundut ni halak parpintor. [1416]

³Hadoharon ampa habayakon do manggoki rumahni, anjaha hapintoronni totap do ronsi sadokah ni dokahni.

⁴Marsinalsal do na lihar ibagas na golap bani halak parpintor; sidear layak, parholong atei do halak parpintor. [1417]

⁵Martuah do halak paridop ni uhur ampa na ra papinjamkon, anjaha na mandalankon horjani domu hubani aturan. [1418]

⁶Seng anjai dugur ia lalab, gabe sitarsingatan do halak parpintor sadokah ni dokahni.

⁷Seng mabiar ia bani barita na masambor, totap do uhurni marhatengeran bani Jahowa. [1419]

⁸Totap do uhurni, seng mabiar ia, ronsi malum uhurni mangidah munsuhni. [1420]

⁹Layak do ia marsibere-bere bani halak na masombuh; hapintoronni manongtong do anjaha tandukni timbul do ibagas hamuliaon. [1421]

¹⁰ididah parjahat ma ai, gabe marborit ni uhur; patungosngoson do iponni ibahen, hape magou, gabe na lang do sura-sura ni halak parjahat. [1422]