Read Batak Simalungun PSALMEN 114 Bible Online

PSALMEN 114 - Batak Simalungun bible

PSALMEN 114

¹Sanggah mandarat Israel hun Masir, ginompar ni si Jakob humbani bangsa na legan. [1429]

²ibahen ma Juda gabe ianan-Ni na ma pansing, anjaha Israel gabe gomgoman-Ni. [1430]

³ididah laut ma ai gabe maporus, anjaha Jordan surut hu pudi. [1431]

⁴Dolog-dolog manlumpat-lumpat songon biribiri tunggal, buntu-buntu songon anak ni biribiri. [1432]

⁵Aha do na masa bam, ale laut, ase maporus ho, anjaha ho, ale Jordan, ase surut ho hu pudi?

⁶Hanima ale dolog-dolog, ase manlumpat-lumpat hanima songon biribiri tunggal, anjaha hanima buntu-buntu songon anak ni biribiri?

⁷Hitir ma, ale tanoh, i lobei ni Tuhan, i lobei ni bohi ni Naibata ni si Jakob, [1433]

⁸na paubahkon dolog batu gabe bah mardalan ampa batu gingging gabe bah tubuh. [1434]