Read Batak Simalungun PSALMEN 116 Bible Online

PSALMEN 116 - Batak Simalungun bible

PSALMEN 116

¹Holong do uhur hubani Jahowa, halani itangihon do sorangku ampa elek-elekku.

²Halani ipaeleng do pinggol-Ni dompak ahu, sai padilo-diloonku do Ia sadokah ahu manggoluh.

³Ililiti rantei ni hamatean do ahu, anjaha biar nagori toruh do mandorab ahu; mandagei hasunsahan ampa sitaronon do ahu. [1445]

⁴Tapi hudilo ma goran ni Jahowa: Ham Jahowa, paluah Ham ma tonduyhu!

⁵Paridop ni uhur do Jahowa anjaha parpintor, parholong do Naibata. [1446]

⁶Jahowa do siramotkon halak paruhur sisaluju; galek hinan do ahu, tapi ipaluah do ahu.

⁷Mulak ma ho sonang, ale tonduyhu, ai domma ibahen Jahowa na madear bam! [1447]

⁸Tongon, domma ipaluah Ham ahu humbani hamatean, matangku humbani iluh ampa naheihu humbani partolsuan.

⁹Boi ma ahu mardalan i lobei ni Jahowa, bani tanoh ni halak na manggoluh. [1448]

¹⁰Totap do ahu porsaya, age pe huhatahon, “Tarpisat tumang do ahu.” [1449]

¹¹Bani na tarsosak ahu, ningku do, “Haganup do jolma sipangkiran-kirani.” [1450]

¹²Naha ma pambalasku bani Jahowa, halani haganup pambahenan-Ni bangku?

¹³Panginuman haluahon ma huangkat, anjaha goran ni Jahowa ma hudilo.

¹⁴Bagah-bagahku bani Jahowa, hugalar ma, hugalar i lobei ni haganup bangsa-Ni. [1451]

¹⁵Harga do bani panonggor ni Jahowa, hamatean ni halak na hinaholongan-Ni. [1452]

¹⁶Tongon, Ham Jahowa, juakjuak-Mu do ahu, juakjuak-Mu tene, anak ni jabolon-Mu naboru, domma itanggali Ham garingku. [1453]

¹⁷Bamu ma galangkononku galangan puji-pujian, anjaha goran ni Jahowa ma padilo-diloonku.

¹⁸Bagah-bagahku bani Jahowa, hugalari ma, hugalari ma i lobei ni haganup bangsa-Ni,

¹⁹i alaman ni rumah ni Jahowa, i tongah-tongahmu, ale Jerusalem. Haleluya.