Read Batak Simalungun PSALMEN 118 Bible Online

PSALMEN 118 - Batak Simalungun bible

PSALMEN 118

¹Puji ma Jahowa, ai pardear layak do Ia, tongon ronsi sadokah ni dokahni do idop ni uhur-Ni! [1456]

²Sai ihatahon Israel ma, “Tongon, ronsi sadokah ni dokahni do idop ni uhur-Ni.” [1457]

³Sai ihatahon ginompar ni si Aron ma, “Tongon, ronsi sadokah ni dokahni do idop ni uhur-Ni.”

⁴Sai ihatahon sihabiari Jahowa ma, “Tongon, ronsi sadokah ni dokahni do idop ni uhur-Ni.”

⁵Humbani hasosakanku do ahu dilo-dilo bani Jahowa; itangihon Jahowa do ahu anjaha ipalumbang.

⁶Jahowa do mangkasomani ahu, seng mabiar ahu Tor aha ma bahenon ni jolma bangku? [1458]

⁷Jahowa do hasomanku, Sipangurupi bangku, ai do ase boi ahu mangkawah bani na mandomdomi ahu. [1459]

⁸Dearan do marhaporusan bani Jahowa, ase martenger ni uhur bani jolma.

⁹Dearan do marhaporusan bani Jahowa, ase martenger ni uhur bani halak na sangap-sangap. [1460]

¹⁰Sagala parbegu manginggoti ahu; mangunsagahkon goran ni Jahowa, siap do sidea hubahen.

¹¹Iinggoti sidea do ahu, tongon iinggoti sidea do ahu; mangunsagahkon goran ni Jahowa; siap do sidea hubahen.

¹²Iinggoti sidea do ahu songon huramah; gajag do sidea songon apuy bani duri-duri; mangunsagahkon goran ni Jahowa siap do sidea hubahen.

¹³Ijullakkon, ijullakkon sidea do ahu ase targompang, tapi Jahowa do na mangurupi ahu.

¹⁴Gogohku pakon dodingku ai ma Jahowa; Ia do na paluahkon ahu. [1461]

¹⁵Sora olob-olob pakon hatuahon do maraloling bani lampolampo ni halak parpintor. Siamun ni Jahowa do sibahen hamonangan. [1462]

¹⁶Siamun ni Jahowa do na timbul, siamun ni Jahowa do sibahen hamonangan.

¹⁷Seng anjai matei ahu, tapi manggoluh do, ase hubaritahon pambahenan ni Jahowa.

¹⁸Iajar, iajar Jahowa do ahu tongon, tapi seng iondoskon bani hamatean. [1463]

¹⁹Ungkab nasiam ma bangku labah ni hapintoron, sihol masukanku do ai, sihol do pujionku Jahowa, [1464]

²⁰On do horbangan marayak Jahowa, halak parpintor do na masuk hujai.

²¹Hupuji ma Ham halani ibalosi Ham do ahu, anjaha Ham do gabe haluahon bangku. [1465]

²²Batu na niambukkon ni tuhang, ai do gabe palas parsuhi. [1466]

²³Marhitei Jahowa do masa ai, halongangan do ai bani matanta.

²⁴Ari on do na jinadihon ni Jahowa. marolob-olob anjaha marmalas ni uhur ma hita halani ai. [1467]

²⁵Ham Jahowa, urupi Ham ma! Ham Jahowa, sai manumpak ma Ham!

²⁶Pinasu-pasu ma na roh marhitei goran ni Jahowa. Ipasu-pasu hanami ma nasiam hun rumah ni Jahowa. [1468]

²⁷Jahowa do Naibata, Ia do na manondangi hita. Atur nasiam ma galangan pesta das hu tanduk ni anjapanjap!

²⁸Naibatangku do Ham, Ham do sipujionku. Ham Naibatangku, Ham do sipatimbulonku. [1469]

²⁹Puji ma Jahowa, ai pardear layak do Ia, tongon ronsi sadokah ni dokahni do idop ni uhur-Ni.