Read Batak Simalungun PSALMEN 132 Bible Online

PSALMEN 132 - Batak Simalungun bible

PSALMEN 132

¹Doding laho tangkog. Mardingat ma Ham, ale Jahowa, bani si Daud, ampa bani haganup halojaonni,

²na dob marbulawan bani Jahowa, na dob marpadan bani Parkuasa ni Jakob: (2 Sam. 7)

³Tongon, seng masukanku lampolampo ni rumahku, seng naikanku iananku modom,

⁴tongon, seng lopasonku matangku tartunduh, atap tarpitpit langkop ni matangku, [1593]

⁵paima jumpah ahu sada ianan bani Jahowa, sada rumah bani Parkuasa ni Jakob. [1594]

⁶Tongon, domma ibogei hita pasal poti parpadanan ai i Eprata, domma dapot hita ai i talun Jaar. [1595]

⁷Masuki hita ma rumah-Ni, manrogop ma hita bani sidogeian ni nahei-Ni. [1596]

⁸Jongjong ma Ham, ale Jahowa, laho ma Ham bani ianan parsaranan-Mu, Ham pakon poti hagogohon-Mu. [1597]

⁹Malim-Mu marpakeian hapintoron do, anjaha hinaholongan-Mu marsurak-surak. [1598]

¹⁰Halani si Daud juakjuak-Mu, ulang ma tulakkon Ham bohi ni na mininakan-Mu. [1599]

¹¹Domma marbija Jahowa bani si Daud, tongon, seng mangeluk Ia hunjai, “Humbani ginompar-Mu do pahundulon-Ku bani paratas-Mu. [1600]

¹²Anggo iramotkon anakmu padan-Ku ampa hasaksian-Ku na Huajarhon bani sidea, anak ni sidea pe hundul do bani paratasmu sadokah ni dokahni.”

¹³Tongon, domma ipilih Jahowa Sion, ipindo uhur-Ni do marhundulan ijai: [1601]

¹⁴On do parsaranan-Ku ronsi sadokah ni dokahni, ijon do Ahu sihol marianan, in do Huharosuhkon.

¹⁵Parbohalanni sai pasu-pasuon-Ku do, halak na masombuhni pabosuron-Ku do bani ruti.

¹⁶Malimni bahenon-Ku do marpakeian haluahon, na hinaholonganni marolob-olob ibagas malas ni uhur.

¹⁷Ijai patubuhon-Ku do sada tanduk bani si Daud, pasirsiron-Ku sada suluh bani na mininakan-Ku. [1602]

¹⁸Munsuhni bahenon-Ku do marhiou habadoron, tapi bani uluni marlinang-linang do sortalini. [1603]