Read Batak Simalungun PSALMEN 139 Bible Online

PSALMEN 139 - Batak Simalungun bible

PSALMEN 139

¹Bani pambobai koor. Sada Psalm humbani si Daud. Ham Jahowa, ipareksa Ham do ahu, anjaha itanda Ham do. [1636]

²Ibotoh Ham do atap na hundul atap na jongjong ahu; iarusi Ham do pingkiranku humbani na daoh. [1637]

³Pardalanku atap parpodomku itulimati Ham do, haganup do dalanku ibotoh Ham. [1638]

⁴Tongon seng dong hata bani dilahku, sabonarni, ganup do ibotoh Ham, ale Jahowa.

⁵Hun pudi pakon hun lobei iinggoti Ham do ahu, inahkon Ham do tangan-Mu bangku.

⁶Halongangan botul do bangku habotohan in, magijangtu, seng tardungdung ahu.

⁷Huja ma ahu laho manimbili tonduy-Mu, anjaha huja ma ahu lintun manlembangi bohi-Mu?

⁸Porini naik ma ahu hu nagori atas, ijai do Ham; Porini hubahen podomanku i nagori toruh ijai do Ham. [1639]

⁹Porini hupakei bangku habong ni buha siang ari, sihol sogop ahu hu ujung ni laut, [1640]

¹⁰ijai pe tangan-Mu do na manangkap ahu, anjaha ijolomi tangan siamun-Mu do ahu.

¹¹Porini huhatahon, “Na golap ma manrungkub ahu, anjaha gabe borngin ma na lihar in bangku!” [1641]

¹²Jadi hagolapan ai pe seng golap Bamu; marsinondang do borngin songon arian, na golap usih songon na lihar. [1642]

¹³Ai Ham do na manjadihon piah-piahku, itonun Ham do ahu ibagas partapaan ni inang,

¹⁴Ham do pujionku, halani halongangan do parjadingku; halongangan do pambahenan-Mu, anjaha torang do ai ididah tonduyhu. [1643]

¹⁵Seng ponop holi-holingku i lobei-Mu, sanggah na ijadihon ahu bani na ponop, sanggah na itonun ahu i partapaan ni inang. [1644]

¹⁶Sanggah solat ope ahu domma ididah panonggor-Mu, domma tarsurat ganupan ai ibagas buku-Mu, domma ibuhul ari-aringku sanggah lape adong age sada. [1645]

¹⁷Mahol do bangku pingkiran-Mu, Ham Naibata! Buei tumang do bilanganni. [1646]

¹⁸Porini sihol hiraonku, bueian do ai ase horsik; anggo puho ahu tong ope ahu i lambung-Mu. [1647]

¹⁹Ambit ibunuh Ham ma, ale Naibata, halak parjahat; anjaha ambit surut ma humbangku halak sionsop daroh,

²⁰na manlawan dompak Ham marhitei akal-akal, na jongjong mangimbang Ham ibagas hajahaton. [1648]

²¹Mintor lang ma sogam uhurhu, ale Jahowa, mangidah halak na marsogam ni uhur Bamu; anjaha mintor lang ma magigi ahu, mangidah halak na manlawan dompak Ham? [1649]

²²Das do sogam ni uhurhu mangidah sidea, munnsuh do sidea bangku.

²³ Pareksa Ham ma ahu, ale Naibata, anjaha tanda Ham ma uhurhu! Uji Ham ma anjaha tanda Ham ma pingkiranku! [1650]

²⁴ Kawahkon Ham ma atap dong mardalan ahu bani dalan hamagouan; togu Ham ma ahu bani dalan sisadokah ni dokahni. [1651]