Read Batak Simalungun PSALMEN 140 Bible Online

PSALMEN 140 - Batak Simalungun bible

PSALMEN 140

¹Bani pambobai koor. Psalm humbani si Daud.

²Sai paluah Ham ma ahu, ale Jahowa, humbani jolma parjahat; humbani halak sipangodoh-odoh, sai parorot Ham ma ahu,

³ai ma halak, na mamingkiri hajahaton ibagas uhurni, na patubuh-tubuhkon hamunsuhon ari-ari. [1652]

⁴Iaroti sidea do dilahni songon ulog, bisa ni ulog darih do i toruh ni bibir ni sidea. Sela. [1653]

⁵Sai parorot Ham ma ahu, ale Jahowa, dompak tangan ni parjahat, anjaha ramotkon Ham ma ahu humbani halak sipangodoh-odoh, na mamingkiri ase jiris naheihu.

⁶Halak sigijang uhur manaon siding bangku, ipaherbang do puhot bani dalanku, anjaha inahkon sidea do tirangkap i dalan padapot ahu. Sela. [1654]

⁷Ningku do bani Jahowa, “Naibatangku do Ham, tangar Ham ma, ale Jahowa, sora ni elek-elekku.” [1655]

⁸Ham Jahowa, Tuhanku, pangurupi na margogoh bangku, Ham do na mangondingi ulungku bani ari parporangan.

⁹Ulang ma palopas Ham, ale Jahowa, sura-sura ni parjahat, ulang ma pasaud Ham riah ni sidea. Sela.

¹⁰Ulang ma mandirgak ulu ni halak na manginggoti ahu, sai mangonai ma bani sidea hajahaton ni bibir ni sidea. [1656]

¹¹Sai mangkadabuh ma narnar bani sidea; sai madabuh ma sidea hubagas lubang, ase ulang tarjongjongkonsi be. [1657]

¹²Halak sipanukas-nukasi, sai ulang ma totap i nagori on; Halak sipangodoh-odoh, sai hamagouan ma na mardakdak sidea.

¹³Tongon, hubotoh do, Jahowa do na pasintongkon uhum bani halak na madoyuk, anjaha na mamintori halak na masombuh. [1658]

¹⁴Tongon, sai pujion ni halak parpintor do goran-Mu, anjaha halak sibujur uhur do marianan i lobei-Mu.