Read Batak Simalungun PSALMEN 143 Bible Online

PSALMEN 143 - Batak Simalungun bible

PSALMEN 143

¹Psalm ni si Daud. Ham Jahowa, tangihon Ham ma tonggongku, tangar Ham ma elek-elekku; romban hubani hasintongan ampa hapintoron-Mu, balosi Ham ma ahu.

²Ulang ma boan Ham juakjuak-Mu hu paruhuman, ai seng dong halak na manggoluh pintor i lobei-Mu. [1669]

³Ai iparburu munsuh do tonduyhu, idogei-dogei do goluhku hu tanoh; inahkon do ahu bani ianan na golap, songon halak na dob dokah matei. [1670]

⁴Mandatei do tonduyhu ibagas diringku, jorgong do pusu-pusungku ibagas.

⁵Hudingat do ari na dob salpu, hupingkiri sagala pambahenan-Mu, anjaha ipahusor-husor uhurhu do jadi-jadian ni tangan-Mu. [1671]

⁶Hupaherbang do tanganku hu Bamu, siholan do tonduyhu Bamu songon tanoh horah-horah. Sela. [1672]

⁷Oloskon Ham ma mambalosi ahu, ale Jahowa, madotei do tonduyhu; ulang ma ponopkon Ham bohi-Mu bangku, ase ulang usih songon halak na manuruk tanoman ahu. [1673]

⁸Patangarhon Ham ma bangku sogod-sogod idop ni uhur-Mu, Bamu do ahu martenger ni uhur. Pabotohkon Ham ma bangku dalan na patut sidalananku, ai Bamu do hudompakkon tonduyhu. [1674]

⁹Paluah Ham ma ahu humbani munsuhku, ale Jahowa, Bamu do ahu maporus.

¹⁰ Ajari Ham ma ahu, mambahen harosuh-Mu, ai Ham do Naibatangku; Tonduy-Mu na madear in ma manogu ahu bani dalan na hornop.

¹¹Halani goran-Mu, ale Jahowa, pagoluh Ham ma ahu; halani hapintoron-Mu, paluah Ham ma tonduyhu humbani hasosakan. [1675]

¹²Halani idop ni uhur-Mu, boiskon Ham ma munsuhku, anjaha ripaskon Ham ma sagala na manosak-nosak tonduyhu, ai juakjuak-Mu do ahu.