Read Batak Simalungun PSALMEN 145 Bible Online

PSALMEN 145 - Batak Simalungun bible

PSALMEN 145

¹Doding puji-pujian ni si Daud. Sihol do patimbulonku Ham, ale Naibatangku, Raja in, anjaha sihol pujionku do goran-Mu lalab ronsi sadokah ni dokahni.

²Ganup ari do pujionku Ham, anjaha pasangaponku do goran-Mu lalab ronsi sadokah ni dokahni.

³Banggal do Jahowa, anjaha sipujian tongon, seng tardodou hatimbulon-Ni. [1688]

⁴Marsipatugahan do sundut-sundut pasal pambahenan-Mu, anjaha ipatugah do horja-Mu na banggal in.

⁵Hinajenges ni hamuliaon-Mu do isahapkon sidea, anjaha halongangan-Mu do na hupingkir-pingkiri.

⁶Hagogohon ni halongangan-Mu do ihata-hatahon sidea, anjaha habanggalon-Mu do ibaritahon sidea.

⁷Pardingatan bani buei ni dear layak-Mu do patugah-tugahon ni sidea, anjaha hapintoron-Mu do olobkononni.

⁸Paridop ni uhur anjaha parholong atei do Jahowa, nanget manringis anjaha parontou ni uhur banggal. [1689]

⁹Pardear layak do Jahowa bani haganup anjaha holong do atei-Ni bani ganup jadi-jadian-Ni. [1690]

¹⁰Ham do ipuji sagala jadi-jadian-Mu, ale Jahowa, anjaha hinalongan-Mu do pasangapkon Ham. [1691]

¹¹Hamuliaon ni harajaon-Mu do ibaritahon sidea, anjaha kuasa-Mu do isahapkon,

¹²laho pabotohkon bani anak ni jolma hagogohon-Mu, pakon hamuliaon ampa hasangapon-Mu. [1692]

¹³Harajaon-Mu ai ma harajaon sisadokah ni dokahni, anjaha panggomgomion-Mu marsundut-sundut do. [1693]

¹⁴Jahowa do manatang ganup halak na sihol jurgang, anjaha ipajongjong do halak na dob ipatunduk. [1694]

¹⁵ Ganup do mata mangkawah dompak Ham, anjaha Ham do na mambere sipanganonni bani panorangni. [1695]

¹⁶ Ham do na mambuha tangan-Mu, anjaha Ham do na pabosur sura-sura ni sagala na manggoluh.

¹⁷Pintor do Jahowa bani sagala dalan-Ni, anjaha paridop ni uhur bani sagala jadi-jadian-Ni. [1696]

¹⁸Dohor do Jahowa bani sagala na mandilo-Si, bani haganup na mandilo-Si ibagas hasintongan.

¹⁹Sura-sura ni na mangkabiari-Si isuhuni do, itangar do doruh-doruh ni sidea anjaha ipaluah do sidea. [1697]

²⁰Jahowa do na manramotkon sagala ma mangkaholongi-Si, tapi sagala halak parjahat iboiskon do.

²¹Puji-pujian bani Jahowa do sahapkonon ni pamanganku, anjaha sagala na manggoluh ipuji ma goran-Ni na pansing in, lalab ronsi sadokah ni dokahni.