Read Batak Simalungun PSALMEN 146 Bible Online

PSALMEN 146 - Batak Simalungun bible

PSALMEN 146

¹Haleluya. Puji ma Jahowa, ale tonduyhu!

²Sai pujionku do Jahowa sadokah ahu manggoluh, sai dodingkononku do Naibata sadokah dong ahu. [1698]*

³Ulang ma marhatengeran nasiam bani halak na sangap-sangap, bani anak ni jolma, na seng dong pangurupion bani. [1699]*

⁴Rotapkonsi hosahni mulak ma ia hu tanoh, jadi bani ari ai magou ma ganup sura-surani. [1700]*

⁵Martuah ma halak, na mambahen Naibata ni si Jakob gabe pangurupini, na marpangarapan bani Jahowa Naibatani,

⁶ai ma Sitompa langit pakon tanoh sonai laut ronsi ganup isini; na manramotkon hasintongan ronsi sadokah ni dokahni. [1701]*

⁷na mamintori halak na niodoh-odoh, na mambere sipanganon bani halak na loheian. Jahowa do na paluahkon halak na tartutup.

⁸Jahowa do na mangungkab mata ni na mapitung, Jahowa do na pajongjong halak na dob ipatunduk, Jahowa do na mangkaholongi halak parpintor. [1702]*

⁹Jahowa do na manramotkon halak panginsolat; isarihon do halak na tading maetek pakon na mabalu, tapi ipapelet do dalan ni halak parjahat. [1703]*

¹⁰Jahowa do manrajai ronsi sadokah ni dokahni. Marsundut-sundut do Naibatamu, ale Sion. Haleluya! [1704]