Read Batak Simalungun PSALMEN 147 Bible Online

PSALMEN 147 - Batak Simalungun bible

PSALMEN 147

¹Haleluya. Dear do mandoding bani Naibatanta, tongon, jenges anjaha talup do puji-pujian sisonai. [1705]

²Jahowa do na pajongjong Jerusalem; Ia do na pahumpul halak Israel na merap in. [1706]

³Ia do na pamalumkon uhur na marosak, anjaha na mambaluti ugah ni sidea. [1707]

⁴Ia do na manotapkon bilangan ni bintang. anjaha idilo do ganup bani goranni. [1708]

⁵Banggal do Tuhanta anjaha margogoh tumang, seng tarsibar hapentaran-Ni. [1709]

⁶Jahowa do panotap bani halak na masombuh, tapi ipatoruh do halak parjahat das hu tanoh. [1710]

⁷Dodingkon ma bani Jahowa doding puji-pujian, dodingkon ma Naibatanami marhitei husapi,

⁸ai Ia do na manrungkub langit marhitei hombun, Ia na pasirsir udan bani tanoh, na patubuhkon poyon-poyon bani dolog-dolog; [1711]

⁹na mambere gagaton bani pinahan, sonai bani anak ni kawak, na siok-siok hu Bani. [1712]

¹⁰Seng dear uhur-Ni mangidah hagogohon ni huda, seng ihadearhon hae-hae ni dalahi. [1713]

¹¹Marosuh do Jahowa bani halak na mangkabiari-Si, na marpangarapan bani idop ni uhur-Ni.

¹²Puji ma, ale Jerusalem, Jahowa; pasangap ma Naibatamu, ale Sion!

¹³Ai Ia do na patoguh oruk-oruk ni horbanganmu, ipasu-pasu do anakmu i tongah-tongahmu.

¹⁴Ibahen do nagorimu mardamei, ipabosur do ho bani gandum na mataboh. [1714]

¹⁵Ia do na manongos hata-Ni hu tanoh on, doras do mardalan tonah-Ni.

¹⁶Ia do na mambere salju songon wol, anjaha na manaburhon namur songon abuan. [1715]

¹⁷Ia do na manampakkon sira-sira-Ni songon batu ranggisgis, ise do na tahan bani borgohni?

¹⁸Itongos do hata-Ni gabe malala ma ai; ibahen do logou-Ni mangombus, jadi mabaor ma bah.

¹⁹Ipatugah do hata-Ni bani si Jakob, paraturan-Ni ampa titah-Ni bani Israel. [1716]

²⁰Seng ibahen na sonai bani ganup bangsa, anjaha titah-Ni seng ibotoh sidea. Haleluya. [1717]