Read Batak Simalungun PSALMEN 148 Bible Online

PSALMEN 148 - Batak Simalungun bible

PSALMEN 148

¹Haleluya. Puji ma Jahowa hun nagori atas, puji ma Ia bani ianan na i babou. [1718]

²Puji ma Ia, nasiam haganup malekat-Ni, puji ma Ia nasiam ganup bala-Ni. [1719]

³Puji ma Ia, ale mata ni ari ampa bulan; puji ma Ia sagala bintang na marsinalsal.

⁴Puji ma Ia, ale langit ni langitan, ampa nasiam bah na i atas ni langit.

⁵Sai ipuji sidea ma goran ni Jahowa, halani marsahap Ia, gabe jadi ma sidea. [1720]

⁶Ia do na patotap sidea ronsi sadokah ni dokahni, ibere do bani sidea aturan, na so boi langgaron. [1721]

⁷Puji ma Jahowa hun tanoh on, hanima dengke bolon na i laut ampa luhung na bagas;

⁸ale apuy pakon sira-sira, salju pakon hombun na manorap, sonai haba-haba na pasaudkon hata-Ni;

⁹ale dolog-dolog pakon buntu-buntu, hayu na marbuah ampa ganup hayu ares;

¹⁰ale binatang pakon ganup pinahan, sagala na manjulur pakon manuk-manuk na marhabong;

¹¹ale raja-raja ni tanoh on ampa sagala bangsa, ale na sangap-sangap ampa panguhum na i tanoh on;

¹²ale nasiam garama pakon anak boru, nasiam na matua rap pakon dakdanak.

¹³Talup do sidea mamuji goran ni Jahowa, ai pitah goran-Ni do na timbul, anjaha hamuliaon-Ni do na mangatasi tanoh pakon langit. [1722]

¹⁴Ia do na patimbul tanduk bani bangsa-Ni, gabe puji-pujian bani ganup na hinaholongan-Ni, bani ginompar ni Israel, bangsa na rapat hu Bani. Haleluya. [1723]