Read Batak Simalungun PSALMEN 16 Bible Online

PSALMEN 16 - Batak Simalungun bible

PSALMEN 16

¹Miktam. Humbani si Daud. Parorot Ham ma ahu Naibata, ai marlingod hu Bamu do ahu. [144]

²Ningku do dompak Jahowa, “Ham do Tuhanku, seng dong na pasonangkon ahu sobali Ham.” [145]

³Halak na ma pansing na i nagori on, marmulia do sidea, marosuh uhur hubani sidea. [146]

⁴Buei do sitaronon ni halak sisombah na legan, tapi seng ra ahu dihut manggalangkon galangan daroh ni sidea ai, nai ma, gari goran ni sidea seng sobuton ni bibirhu. [147]

⁵Jahowa do parbagianan bangku ampa panginumanku; Ham do sitotapkon parbagiananku. [148]

⁶Tongon do tali sibar-sibar mangonai bangku bani ianan na madear, nai ma, dear tumang do parbagiananku. [149]

⁷Pujionku do Jahowa, na mamodahi ahu, age borngin iajari piah-piahku do ahu. [150]

⁸Tongtong do hubahen Jahowa i lobei ni matangku; anggo i siamunku Ia, seng anjai jurgang ahu. [151]

⁹Halani ai malas do uhurhu anjaha marolob-olob tonduyhu, pamatangku pe marianan do bani na sonang. [152]

¹⁰ Ai seng anjai ondoskonon-Mu tonduyhu hu nagori toruh, anjaha seng paturuton-Mu halak na daulat Bamu mangidah hamarsikon. [153]

¹¹ Sai patugahon-Mu do bangku dalan hagoluhan; gok do malas ni uhur i lobei ni bohi-Mu, anjaha hatuahon do i siamun-Mu sadokah ni dokahni. [154]