Read Batak Simalungun PSALMEN 17 Bible Online

PSALMEN 17 - Batak Simalungun bible

PSALMEN 17

¹Tonggo ni si Daud. Tangihon Ham ma, alo Jahowa, hapintoronku. Tangihon Ham ma elek-elekku! Parimbagaskon Ham ma tonggongku, na luar humbani bibir na so manipu. [155]

²Humbani bohi-Mu roh pamintorion bangku, panonggor-Mu do mangidah na sintong. [156]

³Anggo ipapangkei Ham uhurhu, ipareksa Ham borngin, anggo iuji Ham ahu, seng anjai jumpah Ham hajahaton bangku; seng ongga tarlopus parsahapku. [157]

⁴Ia pasal parlahou ni jolma, domu hubani hata na luar hun pamangan-Mu, hujagai do diringku dompak pambahenan ni halak sipangodoh-odoh. [158]

⁵Bokas-Mu do iirikkon langkah-langkahku, seng ongga jiris naheihu. [159]

⁶Sai Ham do hudilo, ai ibalosi Ham do ahu, ale Naibata. Paeleng Ham ma pinggol-Mu bangku, tangihon Ham ma hatangkon. [160]

⁷Patuduhkon Ham ma idop ni uhur-Mu na gok halongangan in, Ham, alo Sipaluah halak na marlingod bani tangan-Mu siamun dompak imbang ni sidea. [161]

⁸Ramotkon Ham ma ahu songon anak ni mata; ponopkon Ham ma ahu i toruh ni linggom ni habong-Mu, [162]

⁹dompak halak parjahat na sihol mangagou ahu, dompak munsuhku na manloulou ahu, [163]

¹⁰Itutup sidea do uhurni, marhitei pamanganni isahapkon hagijangon; [164]

¹¹igompangi sidea do ahu, tarloulou do ahu nuan, sai ipardiateihon mata ni sidea do ahu laho mangompaskon ahu hu tanoh.

¹²Usih do ia hubani singa na laho manoroh, songon anak ni singa na monggop bani ianan na ponop. [165]

¹³Jongjong ma Ham Jahowa, dompakkon Ham anjaha ompaskon Ham ma ia, paluah Ham ma goluhku humbani parjahat marhitei podang-Mu,

¹⁴marhitei tangan-Mu, Ham Jahowa, humbani jolma, ai ma halak paruhur dunia sadokah ia manggoluh, na dob ginokan-Mu boltokni marhitei arta-Mu, na riris homa marniombah, na boi martading-tadingan bani na i pudini. [166]

¹⁵Tapi anggo ahu marhitei hapintoron idahonku do bohi-Mu, hubosuri diringku sanggah na puho ahu bani rupa-Mu. [167]