Read Batak Simalungun PSALMEN 18 Bible Online

PSALMEN 18 - Batak Simalungun bible

PSALMEN 18

¹Bani pambobai koor. Humbani juakjuak ni Jahowa, ai ma si Daud, na manluarhon hata ni doding on bani Jahowa, bani panorang ipaluah Jahowa ia humbani tangan ni munsuhni pakon humbani tangan ni si Saul,

²nini, “Holong tumang do uhurhu bamu Jahowa, hagogohonku.

³Jahowa, dolog batu bangku, batar-batarhu, na paluahkon ahu, Naibatangku, batu gingging anjaha parlingodanku, gantarhu, tanduk haluahonku pakon benteng bangku. [168]

⁴“Pinuji ma Jahowa!” ningku mandilohon, ai ipaluah do ahu humbani munsuhku. [169]

⁵Iinggoti gilumbang ni hamatean do ahu, anjaha bah hamatean manonggoti ahu; [170]

⁶isangkut tali ni nagori toruh do ahu, siding ni hamatean tagang dompak ahu. [171]

⁷Ibagas hasosakankai hudilo ma Jahowa, dilo-dilo ma ahu bani Naibatangku. Gabe itangihon do sorangku humbani rumah-Ni, anjaha das do doruhkai hu pinggol-Ni. [172]

⁸Munjei anjaha dugur ma tanoh on, onjolan ni dolog pe murdug ma, munjei halani ringis-Ni. [173]

⁹Maripul do timus humbani igung-Ni, haluar apuy na mangankon humbani pamangan-Ni, narnar na gara marjimbur hun Bani. [174]

¹⁰Iondun ma langit, turun ma Ia, lotir do i toruh ni nahei-Ni. [175]

¹¹Mangajak herub do Ia, anjaha habang mayap-ayap bani habong ni logou. [176]

¹²Na golap do ibahen manrungkub-Si, lampolampo-Ni inggot ni bah na mamirong ampa hombun na hapal. [177]

¹³Humbani sinalsal na i lobei-Ni luar do hombun-Ni, ambolas pakon gara ni apuy.

¹⁴Marhata ma longgur ibahen Jahowa i langit, ipamaling Na Timbul in ma sora-Ni.

¹⁵Isiorhon ma panah-Ni laho pamerap sidea, ibahen do mardejep-dejep hilap laho mardakdak sidea. [178]

¹⁶Jadi taridah ma holbung ni bah, mulgap ma onjolan ni dunia on, halani pangasupimu Jahowa, halani pangombus ni hosah ni igung-Mu.

¹⁷Idurdurhon do tangan-Ni hun babou manangkap ahu, idokdok do ahu humbani bah banggal. [179]

¹⁸Ipaluah do ahu humbani munsuhku na gogoh, humbani halak na mandondoni ahu, sigogohan humbangku. [180]

¹⁹Idorab sidea do ahu bani ari hasunsahanku, tapi Jahowa do hatundalanku.

²⁰Itogu do ahu bani ianan na lumbang, ipaluah do ahu, ai marosuh do Ia bangku. [181]

²¹Ibahen Jahowa do hu bangku romban hubani hapintoronku, romban hubani haborsihon ni tanganku ipasuang hu bangku, [182]

²²ai huihutkon do dalan ni Jahowa, seng dong manjahati ahu, marbalik humbani Naibatangku.

²³Sai tong do i lobei ni matangku sagala aturan-Ni, anjaha seng hupadaoh titah-Ni humbangku. [183]

²⁴Seng dong sihataon bangku i lobei-Ni, hujaga do diringku dompak hajahaton. [184]

²⁵Halani ai ibalos Jahowa do hu bangku romban hubani hapintoronku, romban hubani haborsihon ni tanganku i lobei-Ni. [185]

²⁶Hubani na bujur uhur, bujur do Ham, hubani halak parpintor, pintor do Ham.

²⁷Bani halak paruhur na pansing ipatidak Ham do hapansingon-Mu, tapi marah do uhur-Mu dompak halak pargeduk.

²⁸Ipaluah Ham do bangsa na madoyuk, tapi ipatoruh Ham do mata na toal. [186]

²⁹Ai Ham do, alo Jahowa, mambahen palitangku marsinalsal; Jahowa Naibatangku do palihar hagolapanku. [187]

³⁰Marhasoman Ham tardorab ahu do hulanan ni bala, mangunsagahkon Naibatangku tarlumpat ahu do tembok. [188]

³¹Gokan dear do dalan ni Naibata, pitah do hata ni Naibata, Ia do gantar ni ganup halak, na marlingod hu Bani. [189]

³²Ai ise ma Naibata sobali Jahowa, ise batar-batarta sobali Naibatanta? [190]

³³Naibata do na manggonditkon hagogohon bangku, anjaha ipatorsa do dalanku.

³⁴Ia do mambahen naheihu songon nahei ni ursa boru-boru, anjaha ipajongjong do ahu i atas buntu-buntu. [191]

³⁵Ia do mangajari tanganku marmunsuh, gabe pandei tanganku manintak sior tombaga. [192]

³⁶Ibere Ham do bangku gantar ni hatuahon-Mu, itungkoli tangan siamun-Mu do ahu, anjaha halayakon-Mu pabanggal ahu. [193]

³⁷Ipalumbang Ham do ianan panlangkahanku, anjaha seng tarsimpok mata ni ari ni naheihu. [194]

³⁸Hupardakdak do munsuhku ronsi dapot sidea, seng mulak ahu paima rasei sidea.

³⁹Huropuki do sidea, gabe seng tarbahensi be jongjong, radag do sidea i toruh ni naheihu.

⁴⁰Igonditkon Ham do bangku hagogohon laho marporang, ipatunduk Ham do imbangku hu toruhku.

⁴¹Ipaundur Ham do munsuhku i lobeihu, anjaha siap do hubahen sagala na mandomdomi ahu. [195]

⁴²Dilo-dilo sidea, tapi seng dong na paluahkon, hubani Jahowa homa, tapi seng itangihon sidea. [196]

⁴³Jadi hulumati ma sidea songon orbuk sihabangkonon ni logou, hulotloti ma sidea songon hubang i tongah dalan. [197]

⁴⁴Ipaluah Ham do ahu humbani paringoran ni bangsa-bangsa, anjaha ipabangkit Ham do ahu gabe kopala ni bangsa-bangsa, bangsa na so hutanda pe marsombah do hu bangku; [198]

⁴⁵ibogeihonsi pasal ahu, mintor itangihon do ahu, halak silegan pe tunduk do sidea papuji-puji ahu.

⁴⁶Mandatei do halak silegan, hitir-hitir do sidea luar humbani bentengni.

⁴⁷Manggoluh do Jahowa, sai tarpuji ma batar-batarhin, sai timbul ma Naibata ni hatuahonku, [199]

⁴⁸Naibata sibere pambalason hu bangku, anjaha na patundukkon bangsa-bangsa bangku.

⁴⁹Na paluahkon ahu humbani munsuhku, nai ma, na pagijangkon ahu mangimbang sagala na manlawan ahu, na paluahkon ahu humbani halak sipangodoh-odoh.

⁵⁰Halani ai pujionku do Ham Jahowa i tongah-tongah ni sagala bangsa, anjaha dodingkononku do goran-Mu. [200]

⁵¹Ia do sibere hatuahon banggal bani raja-Ni, anjaha sibere idop ni uhur bani na mininakan-Ni, ai ma hubani si Daud ampa hubani ginomparni ronsi sadokah ni dokahni.” [201]