Read Batak Simalungun PSALMEN 21 Bible Online

PSALMEN 21 - Batak Simalungun bible

PSALMEN 21

¹Bani pambobai koor. Psalm ni si Daud.

²Ham Jahowa, marmalas ni uhur do raja in halani hagogohon-Mu, anjaha marolob-olob tumang do ia mangidah haluahon na hun Bamu. [219]

³Ibere Ham do hubani pinindo ni uhurni, anjaha seng itulak Ham pangindoan ni bibirni. Sela. [220]

⁴Ai ialo-alo Ham do ia marhasoman pasu-pasu na banggal, igotongkon Ham do bani sortali omas. [221]

⁵Ipindo do hagoluhan hun Bamu; ibere Ham do hu bani umur na ganjang ronsi sadokah ni dokahni. [222]

⁶Timbul do hasangaponni halani pangurupion na hun Bamu, hatunggungon pakon hahormaton ibere Ham do hu bani.

⁷Ibahen Ham do ia gabe pasu-pasu torus, ipasabou Ham do ia marhitei malas ni uhur ni bohi-Mu. [223]

⁸Ai martenger ni uhur bani Jahowa do raja in, anjaha halani idop ni uhur ni Tang Sitimbulan in, seng anjai rebeh ia.

⁹Sai na jumpah tangan-Mu do munsuh-Mu; anjaha sai na jumpah tangan siamun-Mu do na mandomdomi Ham. [224]

¹⁰Doskon pamurunan do sidea bahenon-Mu bani panorang paroh-Mu, Ham Jahowa, bani parringis-Mu bonduton-Mu do sidea, anjaha panganon ni apuy do sidea. [225]

¹¹Boiskonon-Mu do niombah ni sidea hun tanoh on, ginomparni hun tongah-tongah ni jolma manisia. [226]

¹²Anggo ipingkiri sidea na jahat dompak Ham, anggo iranggihon tahi-tahi seng anjai saud ai. [227]

¹³Sai na maporus do sidea bahenon-Mu; tembakon-Mu do bohi ni sidea marhitei sior-Mu. [228]

¹⁴Jongjong ma Ham, ale Jahowa, ibagas hagogohon-Mu, ase ipuji anjaha idodingkon hanami kuasa-Mu.