Read Batak Simalungun PSALMEN 22 Bible Online

PSALMEN 22 - Batak Simalungun bible

PSALMEN 22

¹Bani pambobai koor. Inggouni: Balua manlele siang. Psalm ni si Daud.

²Ham Naibatangku, mase ma itadingkon Ham ahu, mandaoh Ham humbani elek-elekku pakon humbani sora ni doruh-doruhku? [229]

³Ham Naibatangku, dilo-dilo do ahu arian, tapi seng ibalosi Ham, borngin pe, tapi seng jumpah ahu hasonangan. [230]

⁴Tapi Ham do Na Pansing in, na marhotak i atas ni sipujion ni Israel. [231]

⁵Ham do ihatengerhon ompungnami, tenger do uhur ni sidea Bamu, gabe ipaluah Ham do sidea. (Ps. 78)

⁶Hu Bamu do sidea dilo-dilo, gabe maluah do sidea; porsaya do sidea Bamu, jadi seng tarbador sidea; [232]

⁷tapi anggo ahu goya mando, seng be jolma, siapason ni halak, sidorunon ni halak na mabuei. [233]

⁸Haganup na mangidah ahu pahiri-hiri ahu, ipambebeoti do ahu anjaha iupir-upirhon uluni, [234]

⁹“Bani Jahowa ma ia marondos, ase ipaluah ia, anggo na marosuh do tongon Ia bani!” [235]

¹⁰Ham do na manogu ahu humbani partapaan, Ham do patenger uhurhu mangonsop bagod ni inang; [236]

¹¹humbani partubuhku nari Ham do parondosanku, humbani partapaan nari Ham do Naibatangku.

¹²Sai ulang ma mandaoh-daoh Ham humbangku, ai dohor do hasosakan, seng dong sipangurupi.

¹³Buei do lombu jonggi manlioti ahu, anjaha horbou ni Basan mangurup ahu. [237]

¹⁴Ipangangang bei do babahni dompak ahu, songon singa na manoroh anjaha maraum.

¹⁵Durus do ahu songon bah, mangkasirang holi-holingku, uhurhu pe songon lilin do, malala ibagas diringku. [238]

¹⁶Horah do tolonanku songon sanga-sanga, anjaha dilahku longkot do bani langit-langitku; bani orbuk ni hamatean do iparagei Ham ahu. [239]

¹⁷Ai ilioti baliang do ahu, anjaha hulanan ni parjahat manginggoti ahu, itobaki do tanganku pakon naheihu. [240]

¹⁸Boi do hubilangi haganup holi-holingku, pasombuhkon do sidea mangidah ahu.

¹⁹Ibagi sidea do hiouhu, manjomput na sinurat do sidea pasal baju-bajungku. [241]

²⁰Tapi Ham Jahowa, ulang ma Ham mandaoh-daoh; Ham hagogohonku, oloskon Ham ma mangurupi ahu! [242]

²¹Sai paluah Ham ma hosahku humbani podang, tonduyhu na lungunan on humbani sisilon ni baliang. [243]

²²Sai paluah Ham ma ahu humbani babah ni singa, anjaha bansah bahen Ham humbani tanduk ni horbou jalang.

²³Ambilankononku ma goran-Mu bani saninangku, pujionku ma Ham i tongah-tongah ni kuria in. [244]

²⁴Nasiam na mangkabiari Jahowa, puji nasiam ma Ia; haganup ginompar ni si Jakob, pasangap ma Ia, mabiar ma nasiam Bani, nasiam ginompar ni Israel.

²⁵Ai seng ongga ipahiri anjaha magigi Ia bani hadoyukon ni na madoyuk, anjaha seng ongga iponopkon bohi-Ni hu bani, itangihon do sanggah dilo-dilo Bani. [245]

²⁶Hun Bamu do harohan ni puji-pujianku i tongah-tongah ni kuria na banggal in, galaronku ma bagah-bagahku i lobei ni sagala na mangkabiari-Si. [246]

²⁷Sai na mangan anjaha maningon bosur do halak na masombuh; maningon mamuji-muji Jahowa do halak na mangindahi-Si. Sai hinsah do uhur ni sidea sadokah ni dokahni. [247]

²⁸Dingaton ni sagala ujung ni tanoh on ma ai anjaha mulak bani Jahowa; sagala bangsa sipajuh begu-begu maningon manrogop do i lobei-Ni. [248]

²⁹Ai Jahowa do simada harajaon, anjaha Ia do na mamarentah sagala bangsa. [249]

³⁰Nai ma, maningon marsombah do hu Bani sagala na sangap-sangap ni tanoh on, anjaha maningon do manrogop hu lobei-Ni sagala na dob tuad hubagas orbuk ampa halak na so manggoluh be tonduyni. [250]

³¹Sai balosan ni ginompar ni na i pudi do Ia, baritahononkon do pasal Jahowa bani sundut na roh. [251]

³²Ambilankonon do hapintoron-Ni bani sagala bangsa na laho tubuh ope, paboa Ia do na pasaudkonsi. [252]