Read Batak Simalungun PSALMEN 28 Bible Online

PSALMEN 28 - Batak Simalungun bible

PSALMEN 28

¹Humbani si Daud. Hu Bamu do ahu dilo-dilo, ale Jahowa, dolog batungku; ulang sai sip Ham dompak ahu, ase ulang ahu doskon na manuruk tanoman, anggo sai sip Ham dompak ahu. [306]

²Tangihon Ham ma sora ni elek-elekku, anggo dilo-dilo ahu Bamu, anggo hupaherbang tanganku hubani ianan-Mu na pansing sahalian in. [307]

³Ulang ma sarad Ham ahu rap pakon halak parjahat ampa sihorjahon hagedukon, na basar marsahap dompak hasomanni, hape hajahaton do ibagas uhurni. [308]

⁴Balaskon Ham ma hubani sidea romban bani pambahenan ni sidea pakon domu hubani jahat ni ulahni; balaskon Ham ma romban hubani horja ni tangan ni sidea; paulak Ham ma bani sidea na hinorjahon ni sidea. [309]

⁵Ai seng parduli sidea bani pambahenan ni Jahowa, sonai homa horja ni tangan-Ni; parsedaon-Ni ma sidea anjaha seng be paulion-Ni. [310]

⁶Na puji ma Jahowa, ai domma itangihon sora ni elek-elekku. [311]

⁷Jahowa do gogohku pakon gantarhu; hu Bani do mangarap uhurhu gabe iurupi do ahu. Halani ai marolob-olob do uhurhu, anjaha hupuji ma Ia marhitei dodingku. [312]

⁸Jahowa do pargogoh bani bangsa-Ni, anjaha batar-batar hatuahon do Ia bani na mininakan-Ni. [313]

⁹Paluah Ham ma bangsa-Mu anjaha pasu-pasu ma pusaka-Mu; sai parmahani anjaha ombah Ham ma sidea ronsi sadokah ni dokahni. [314]