Read Batak Simalungun PSALMEN 30 Bible Online

PSALMEN 30 - Batak Simalungun bible

PSALMEN 30

¹Psalm. Doding pamongkoton ni Rumah Panumbahan. Humbani si Daud. [325]

²Sihol do patimbulonku Ham Jahowa, ai Ham do na mandokdok ahu humbani ianan na bagas, anjaha seng ipalopas Ham marmegah-megah munsuhku mangidah ahu. [326]

³Ham Jahowa, Naibatangku, hu Bamu do ahu dilo-dilo, jadi ipamalum Ham do ahu. [327]

⁴Ham Jahowa, domma ipanaik Ham tonduyhu hun nagori toruh, domma ipagoluh Ham use ahu, maluah humbani na manuruk tanoman. [328]

⁵Dodingkon nasiam ma Jahowa, nasiam hinaholongan-Ni, puji ma goran-Ni na pansing in! [329]

⁶Ai tongkin do panomboh ni ringis-Ni, sadokah manggoluh do anggo idop ni uhur-Ni, bodari sogop partangison, patarni masa parolob-oloban. [330]

⁷Tapi anggo ahu sanggah sonang ongga huhatahon, “Seng anjai targompang ahu.” [331]

⁸Ham Jahowa, marhitei dear layak-Mu ipatotap Ham do ahu i atas ni dolog na toguh; hape ijin iponopkon Ham bohi-Mu mintor tarsonggot ahu.

⁹Hu Bamu do ahu dilo-dilo, Ham Jahowa, hubani Naibatangku do ahu mangelek-elek.

¹⁰Aha ma laba-Mu marhitei darohku, anggo tuad ahu hu tanoman? Boi ma pujion ni orbuk Ham atap patugahonni habujuron-Mu? [332]

¹¹Tangihon Ham ma Jahowa, maidop ma Ham bangku, Ham Jahowa, sai Ham ma pangurupi bangku!

¹²Domma ipaubah Ham tangisku gabe tortor bangku. Domma itanggali Ham pusok ni uhurhu, anjaha igonditkon Ham do bangku malas ni uhur, [333]

¹³ase mandoding-doding tonduyhu Bamu anjaha lang masip. Ham Jahowa, Naibatangku, sadokah ni dokahni do Ham pujionku. [334]