Read Batak Simalungun PSALMEN 31 Bible Online

PSALMEN 31 - Batak Simalungun bible

PSALMEN 31

¹Bani pambobai koor. Psalm ni si Daud.

²Hu Bamu do ahu, alo Jahowa, marhatengeran, ulang ma lopas Ham ahu lalab bador; paluah Ham ma ahu marhitei hapintoron-Mu! [335]

³Paeleng Ham ma pinggol-Mu hu bangku, tarolos ma Ham paluahkon ahu. Ham ma bangku dolog-batu paronding-ondingan, gabe benteng na toguh laho paluahkon ahu; [336]

⁴ai Ham do tongon dolog batungku pakon bentengku, halani goran-Mu iring-iring anjaha togu Ham ma ahu. [337]

⁵Sai paluah Ham ma ahu humbani siding, na ponop itaon halak laho manangkap ahu, ai Ham do haporusanku. [338]

⁶Hubagas tangan-Mu do huondoskon tonduyhu, ai domma itobus Ham ahu, ale Jahowa, Ham Naibata hatengeran ni uhur. [339]

⁷Ihagigihon Ham do na manombah sisombahon na so margagan, tapi anggo ahu tenger do uhur hubani Jahowa. [340]

⁸Marolob-olob anjaha marmalas ni uhur do ahu bani idop ni uhur-Mu, ai ikawahkon Ham do hadoyukonku, anjaha ibotoh Ham do hasosakan ni tonduyhu. [341]

⁹Seng iondoskon Ham ahu hubagas tangan ni munsuh, ipajongjong Ham do nahei hubani na lumbang. [342]

¹⁰Maidop ma uhurmu bangku, ale Jahowa, ai tarsosak do ahu; halani pusok ni uhur holok do matangku, galek do tonduyhu pakon pamatangku. [343]

¹¹Bois do gogohku ibahen horu ni uhur, ampa ari-ari ni goluhku ibahen holsohku; surut do gogohku ibahen panlanggaronku, seng margolle be holi-holingku. [344]

¹²Parbileian do ahu i lobei ni na manosak ahu, ampa bani halak romban rumahku; tarsonggot do na mananda ahu, manimbil bei do na mangidah ahu i dalan. [345]

¹³Ihalupahon ahu songon halak na matei, marosak do ahu songon sanga-sanga. [346]

¹⁴Hubogei do husip-husip ni buei halak, “Habiaran inggot!” Rap manriah do sidea manguhurhon ahu, mambahen ranggian do sidea laho mambuat goluhku. [347]

¹⁵Tapi anggo ahu, Bamu do ahu martenger ni uhur, ale Jahowa, ningku do, “Ham do Naibatangku. [348]

¹⁶Marguru Bamu do goluhku, paluah Ham ma ahu humbani tangan ni munsuhku pakon humbani na mangayak-ayak ahu. [349]

¹⁷Sondangkon Ham ma bohi-Mu bani juakjuak-Mu, paluah Ham ma ahu marhitei idop ni uhur-Mu. [350]

¹⁸Ham Jahowa, ulang lopas Ham ahu bador, hu Bamu do ahu dilo-dilo; tarbador ma namin halak parjahat, anjaha masip tuad hu nagori toruh.

¹⁹Sai sip ma sagala bibir parladung, na jungkat marsahap dompak halak parpintor, gok hatoalon ampa pangapasion.

²⁰Banggalni in dear ni layak-Mu, na pinasirsir bani halak na mangkabiari Ham, na binahen-Mu bani halak na martenger ni uhur Bamu, i lobei ni anak ni jolma. [351]

²¹Iondingi Ham do sidea marhitei pangondingion ni bohi-Mu dompak tahi-tahi ni jolma, iponopkon Ham do sidea bani lampolampo dompak sorgang-sorgang ni dilah. [352]

²²Napuji ma Jahowa, ai tarlobih do idop ni uhur-Ni bangku bani panorang hasosakan. [353]

²³Tapi anggo ahu, hupingkir hinan do ibagas biarhu: Domma tarbuang ahu humbani panonggor-Mu. Hape itangihon Ham do elek-elekku, sanggah dilo-dilo ahu Bamu. [354]

²⁴Sai haholongi nasiam ma Jahowa, nasiam sagala na hinaholongan-Ni! Jahowa do manramotkon sagala halak na bujur, tapi mardapot-dapot do ibalaskon dompak sigijang uhur. [355]

²⁵Sai margogoh anjaha totap ma uhur nasiam, sagala na marpangarapan bani Jahowa.” [356]