Read Batak Simalungun PSALMEN 32 Bible Online

PSALMEN 32 - Batak Simalungun bible

PSALMEN 32

¹Humbani si Daud. Doding podah. Martuah ma halak na dob sinasap panlanggaronni, na dob nirungkub dousani. [357]

² Martuah ma halak anggo seng ihira Jahowa bani hajahaton, anjaha seng dong sipakulah-kulah ibagas tonduyni. [358]

³Ai sadokah huhasipkon dousangku, reong do holi-holingku ibahen tangisku ganup ari. [359]

⁴Ai sai idondoni tangan-Mu do ahu arian pakon borngin, jadi horah ma darohku songon pambahen ni milas ni logou ni ari. Sela. [360]

⁵Hupabotohkon ma Bamu dousangku, anjaha seng huponopkon hajahatonku, ningku do, “Sopotkononku ma panlanggaronku hubani Jahowa, jadi isasap Ham do utang ni dousangku.” [361]

⁶Halani ai martonggo ma hu Bamu sagala na daulat maruhur, sanggah adong ope panorang boi marjumpah; roh pe sompong bah marraja, seng anjai das ai hu bani. [362]

⁷Ham do parlingodanku, iramotkon Ham do ahu humbani hasosakan, haluahon do iinggotkon Ham bangku. Sela. [363]

⁸Huajari anjaha hupodahi pe ho pasal dalan sidalananmu, huparmaloi anjaha iiring-iring pangkawahku pe ho. [364]

⁹Ulang ma nasiam songon huda atap halode na so maruhur, na so ra dohor bam anggo lang pinaksa ni tali pakon kokang. [365]

¹⁰Buei do siandungon ni parjahat, tapi barang ise na martenger ni uhur bani Jahowa, inggotkonon-Ni do bani idop ni uhur. [366]

¹¹Marmalas ni uhur anjaha marolob-olob ma sagala parpintor ibagas Jahowa; marmegah-megah ma ganup paruhur na pintor. [367]