Read Batak Simalungun PSALMEN 33 Bible Online

PSALMEN 33 - Batak Simalungun bible

PSALMEN 33

¹Marolob-olob ma nasiam halak parpintor ibagas Jahowa, patut do mamuji-muji paruhur na bujur. [368]

²Puji ma Jahowa marhasoman husapi, dodingkon nasiam ma Ia marhitei husapi sisapuluh tali. [369]

³Dodingkon nasiam ma Bani doding na baru, giut nasiam ma tali husapi marhasoman tarompit. [370]

⁴Ai pintor do hata ni Jahowa, anjaha sintong do sagala pambahenan-Ni. [371]

⁵Holong do uhur-Ni bani hapintoron ampa uhum. Idop ni uhur ni Jahowa do manggoki tanoh on. [372]

⁶Marhitei hata ni Jahowa do ijadihon langit, anjaha marhitei hosah ni pamangan-Ni sagala bala-Ni. [373]

⁷Ipatumpu do bah ni laut songon bongbongan, ibahen do laut bolag ai markamar-kamar. [374]

⁸ Sai marhabiaran bani Jahowa ma ganup tanoh on, anjaha gobir ma i lobei-Ni ganup sindunia on. [375]

⁹ Ai marsahap Ia gabe jadi ma, ai mamarentah Ia gabe adong ma. [376]

¹⁰Jahowa do mansedahon riah ni bangsa parbegu, seng asi ibahen pingkiran ni bangsa-bangsa. [377]

¹¹Tapi ranggian ni Jahowa totap do sadokah ni dokahni, pingkiran ni uhur-Ni pe marsundut-sundut do. [378]

¹²Martuah ma bangsa na mambahen Jahowa Naibatani, ai ma bangsa pinilih-Ni gabe parbagianan Bani. [379]

¹³Manatap-natap do Jahowa hun nagori atas, ikawahkon ganup anak ni jolma in. [380]

¹⁴Humbani ianan-Ni marparatas tonggor do Ia bani haganup na mangiankon tanoh on.

¹⁵Ia do na manjadihon uhur ni sidea, Ia mardiateihon sagala horja ni sidea. [381]

¹⁶Seng monang raja marhitei buei ni bala, seng maluah puanglima marhitei surung ni gogoh. [382]

¹⁷Taroto do halak na mangajamkon gogoh ni huda, ai marhitei gogohni na buei ai seng boi ia paluahkon. [383]

¹⁸Tonggor ma, dompak na mangkabiari-Si do mata ni Jahowa, dompak halak na marpangarapan bani idop ni uhur-Ni, [384]

¹⁹laho paluahkon tonduy ni sidea humbani hamatean, anjaha laho pagoluhkon sidea bani musim lohei. [385]

²⁰Marhatengeran bani Jahowa do tonduynami, Ia do pangurupi pakon gantar bennami. [386]

²¹Ai marhiteihon-Si do malas uhurnami; ai bani goran-Ni na pansing in do hanami marhatengeran. [387]

²²Sai sorap ma, Ham Jahowa, idop ni uhur-Mu bennami, songon na niarapkonnami hun Bamu.