Read Batak Simalungun PSALMEN 34 Bible Online

PSALMEN 34 - Batak Simalungun bible

PSALMEN 34

¹Humbani si Daud, Sanggah Ipapodou-podou Dirini i lobei ni si Abimelek, gabe Iusir Ia Lanjar Laho.

²Sai pujionku do Jahowa bani sagala panorang, tongtong do puji-pujian-Ni ibagas pamanganku. [388]

³Marhitei Jahowa do marmegah-megah tonduyhu, ibogei halak na madoyuk ma ai gabe malas ma uhurni. [389]

⁴Hasomani nasiam ma ahu pabanggalhon Jahowa, sai rap ma hita patimbulhon goran-Ni in. [390]

⁵Hupindahi do Jahowa, anjaha ibalosi do ahu; ipaluah do ahu humbani sagala habiaranku.

⁶Mangkawah ma nasiam hu Bani, ase minar nasiam, gabe lang tarmela bohi nasiam. [391]

⁷Dilo-dilo do halak na masombuh on, itangihon Jahowa do ia, anjaha ipaluah do ia humbani haganup hasosakanni. [392]

⁸Marjaga do malekat ni Jahowa inggot bani na mangkabiari-Si, anjaha ipaluah do sidea. [393]

⁹ Dai anjaha tonggor nasiam ma dear ni layak ni Jahowa, martuah ma halak na martenger ni uhur Bani. [394]

¹⁰Habiari nasiam ma Jahowa, nasiam sagala na pansing, ai seng anjai marhahurangan sagala na mangkabiari-Si. [395]

¹¹Anak ni singa hurangan do anjaha loheian, tapi seng anjai hurangan bani sagala na madear halak na mangindahi Jahowa. [396]

¹²Roh ma, nasiam anak, tangihon nasiam ma hatangku, ase huajarhon bani nasiam biar dompak Jahowa. [397]

¹³Ise halak na sihol mangkaholongi goluh on, na mangkarosuhkon mangidah ari na madear? [398]

¹⁴Jaga ma dilahmu dompak hajahaton, ampa bibirmu humbani hata tipu. [399]

¹⁵Surut ma ho humbani na masambor, horjahon na madear, pindahi damei anjaha parayak ma ai. [400]

¹⁶Dompak halak parpintor do mata ni Jahowa, anjaha pinggol-Ni dompak dilo-dilo ni sidea. [401]

¹⁷Ilawan bohi ni Jahowa do sihorjahon na jahat, laho mamboiskon hun tanoh on pardingat ni sidea. [402]

¹⁸Anggo dilo-dilo halak parpintor, sai itangihon Jahowa do, anjaha ipaluah do sidea humbani haganup hasosakanni.

¹⁹Dohor do Jahowa bani halak paruhur na marosak, anjaha ipaluah partonduy na maropuk. [403]

²⁰Buei pe sitaronon ni halak parpintor, tapi ipaluah Jahowa do ia humbani haganupan ai. [404]

²¹Ia do manramotkon ganup holi-holini, ase ulang maponggol age sada. [405]

²²Sai hamatehonon ni parjahat do hajahaton, anjaha maningon marutang do na mandomdomi halak parpintor.

²³Jahowa do sitobus tonduy ni juakjuak-Ni, anjaha seng anjai marutang sagala na martenger ni uhur Bani. [406]