Read Batak Simalungun PSALMEN 35 Bible Online

PSALMEN 35 - Batak Simalungun bible

PSALMEN 35

¹Humbani si Daud. Ham Tuhan, imbang Ham ma na mangimbang ahu, porang Ham ma na mamorang ahu. [407]

²Jolom Ham ma gantar etek pakon gantar bolon, jongjong ma Ham mangurupi ahu. [408]

³Ondamkon Ham ma tanja pakon tangkei dompak na mangayak ahu, hatahon Ham ma bani tonduyhu, “Ahu do sipaluah ho.”

⁴Bahen Ham ma maila anjaha tarbador na manguhurhon hosahku, bahen Ham ma surut anjaha maila na manranggihon hamagouan dompak ahu. [409]

⁵Paturut Ham ma sidea songon lapa-lapa niombus ni logou, anjaha malekat ni Jahowa ma mardakdak sidea. [410]

⁶Sai golap ma dalan ni sidea anjaha landit, anjaha malekat ni Jahowa ma marburu sidea. [411]

⁷Ponop anjaha seng marhala itaon sidea siding ni sidea bangku, anjaha seng marhala ihurak sidea do godung mambuat hosahku. [412]

⁸Sai sogop ma bani hasedaon na so ingkat binotohni, siding na tinaonni na ponop ai ma manangkapsi, sai majomba ma ia hubagas godungni ai. [413]

⁹Tapi marolob-olob do tonduyhu ibagas Jahowa, anjaha marmegah-megah halani pangurupi-Ni.

¹⁰Haganup holi-holingku mangkatahon, “Ham Jahowa, ise ma na songon Ham, na paluahkon halak na madoyuk humbani halak sigogohkonni, halak na musil ampa na madorun humbani panrampok?” [414]

¹¹Marrohan do saksi na jahat-jahat, isungkuni do ahu pasal na so hubotoh. [415]

¹²Na jahat do ibahen bangku balos ni na madear, tarpunjung do ahu halani ai. [416]

¹³Tapi anggo ahu, sanggah boritan sidea hinan, hupakei do pakeian pusok ni uhur, huarsik do diringku marhitei puasa, anjaha unduk do ahu martonggo, [417]

¹⁴songon dompak huan-kuanku ampa saninangku sonai do hubahen pangabangku, marpakeian pusok ni uhur, unduk songon na mateian inang, sonai do unduk ahu.

¹⁵Hape dob targompang ahu, megah ma sidea, anjaha martumpu-tumpu laho mangimbang ahu; halak na so hutanda mandorab ahu, anjaha seng marnamangadi sidea mangapasi ahu.

¹⁶Seng maralang-alang sidea pahirihon ahu, ipangesnges do iponni dompak ahu. [418]

¹⁷Ham Jahowa, piga dokah on do sai paidah-idahon-Mu sonin? Paluah Ham ma tonduyhu humbani siparaum, sonai homa hosahku humbani anak ni singa. [419]

¹⁸Sai pujionku do Ham i tongah-tongah ni Kuria na banggal, anjaha pasangaponku do Ham i tongah-tongah ni jolma na mabuei. [420]

¹⁹Sai ulang ma lopas Ham marmalas ni uhur imbangku, siparladung, mangidah ahu, na mangkasogamkon ahu na so ingkat marhala, na pahirdop-hirdop matani. [421]

²⁰Ai seng dong damei isahapkon sidea, iranggi do panipuon dompak halak parsip i nagori in. [422]

²¹Ipangangang sidea do babahni dompak ahu, anjaha nini, “E, e, e, domma ididah matanami.” [423]

²²Domma ididah Ham ai, Ham Tuhan, sai ulang ma Ham sip, sai ulang ma Ham mandaoh-daoh humbangku, ale Jahowa.

²³Jongjong ma Ham anjaha roh ma Ham mambela pakarangku, Ham Naibatangku anjaha Tuhanku! [424]

²⁴Pintori Ham ma ahu romban hubani hapintoron-Mu, Ham Jahowa Naibatangku, ase ulang marmogah-mogah sidea mangidah ahu,

²⁵ase ulang ihatahon sidea ibagas uhurni, “E, e, domma das sura-surangku!” ase ulang ihatahon sidea, “Domma ibondut hanami ia!” [425]

²⁶Sai maila anjaha tarbador ma sagala na mangkamalaskon hamagouanku. Sai marhiou hailaon ampa habadoron ma halak na pajuntul-juntulhon dirini dompak ahu. [426]

²⁷Sai marolob-olob anjaha marmalas ni uhur ma halak na mangkasiholi hapintoronku, sai tongtong ma ihatahon sidea, “Timbul do Jahowa, na mangkarosuhkon haluahon ni juakjuak-Ni.” [427]

²⁸Sai patugah-tugahon ni dilahku do hapintoron-Mu, anjaha puji-pujian ma Bamu ganup ari. [428]