Read Batak Simalungun PSALMEN 37 Bible Online

PSALMEN 37 - Batak Simalungun bible

PSALMEN 37

¹Humbani si Daud. Ulang ma ho marah dompak halak parjahat, anjaha ulang ma sogam uhurmu bani na mangkorjahon hagedukon; [439]

²ai doras do sidea melus songon poyon-poyon, anjaha hurleh songon tulmok na maratah. [440]

³Martenger ni uhur bani Jahowa ma ho anjaha horjahon ma na madear. Iankon ma tanoh in, anjaha ramotkon habujuron. [441]

⁴ Hamalaskon ma Jahowa, jadi bereon-Ni ma hubam harosuh ni uhurmu. [442]

⁵ Ondoskon ma dalanmu bani Jahowa anjaha hatengerhon Ia, ase Ia patorsahon. [443]

⁶Jadi papoltakon-Ni ma hapintoronmu songon na lihar, anjaha habonaronmu songon tongah arian. [444]

⁷Sip ma ho i lobei ni Jahowa, anjaha pahamot Ia; ulang ma sogam uhurmu mangidah halak na mardohar dalanni, mangidah halak sihorjahon panipuon. [445]

⁸Ampogi ma ringis, tadingkon gila, ulang marsogam ni uhur, ai mambobai huhajahaton do hansa in. [446]

⁹Ai maningon masab do sihorjahon hajahaton, tapi halak na martenger ni uhur bani Jahowa do sitean tanoh on. [447]

¹⁰Tongkin nari gelah seng dong be parjahat in, anggo ipardiatei ho iananni, seng jumpah be ia; [448]

¹¹tapi na lamlam maruhur do sitean tanoh in, anjaha hamalaskonon ni uhur ni sidea do hadameion na gok. [449]

¹²Sai martahi-tahi do parjahat dompak halak parpintor, anjaha ngesnges iponni ibahen dompaksi. [450]

¹³Tartawa do Jahowa mangidahsi, ai domma ididah paroh ni ajalni. [451]

¹⁴Isintak halak parjahat do podang anjaha ipasang siorni, laho manjombahon halak na madoyuk pakon na masombuh, laho manayat halak na bujur maruhur. [452]

¹⁵Hape podangni manobak pusu-pusuni sandiri, anjaha siorni mangkaponggol. [453]

¹⁶Rahanan do na otik, na dong bani halak parpintor, ase na marsulei-sulei bani halak parjahat, [454]

¹⁷ai ripukkononkon do botohon ni halak parjahat, tapi itungkol Jahowa do halak parpintor. [455]

¹⁸Ibotoh Jahowa do ari ni halak na daulat, anjaha totap do sadokah ni dokahni siteanon ni sidea.

¹⁹Seng anjai tarbador sidea sanggah roh hasosakan, anjaha bosuran do sidea bani musim lohei. [456]

²⁰Tongon do, maningon magou do halak parjahat, anjaha songon hajagaron ni ladang do munsuh ni Jahowa, masab do sidea songon timus. [457]

²¹Manraih do parjahat, tapi seng ipaulak; tapi paridop ni uhur anjaha pardear layak do halak parpintor. [458]

²²Tongon do, halak na pinasu-pasu-Ni do manean tanoh in, tapi halak na binuraan-Ni maningon magou do. [459]

²³Jahowa do sibobai langkah ni dalahi, anjaha itumpak do dalan ni na hinarosuhkon-Ni. [460]

²⁴Targompang pe ia, seng lanjar gayap, ai Jahowa do na manungkol tanganni. [461]

²⁵Danak do ahu sapari, domma matua sonari, tapi seng ongga huidah tartading halak parpintor, anjaha mangindo-indo sipanganon ginomparni. [462]

²⁶Sai maridop ni uhur do ia bani ganup panorang anjaha paraihkon; parhiteian ni pasu-pasu do ginompar-Ni. [463]

²⁷Surut ma ho humbani na jahat, horjahon na madear, ase totap ho ronsi sadokah ni dokahni. [464]

²⁸Ai holong do atei ni Jahowa bani uhum, anjaha seng itadingkon halak niidopan-Ni. Ramotkonon-Ni do sidea sadokah ni dokahni, tapi ginompar ni halak parjahat maningon bois do. [465]

²⁹Teanon ni halak parpintor do tanoh in, anjaha tongtong do sidea marianan ijin. [466]

³⁰Mamodahkon hauhuron do pamangan ni halak parpintor, anjaha dilahni mangkatahon na sintong. [467]

³¹Iparimbagaskon do titah ni Naibatani ibagas uhurni, anjaha seng anjai tarlandit langkahni. [468]

³²Sai igompangi halak parjahat do halak parpintor, sihol do bunuhonni ia. [469]

³³Tapi seng anjai bereon ni Jahowa ia hubagas tanganni, anjaha seng paturutonni ia hona uhum sanggah i paruhuman ia. [470]

³⁴Ajamkon ma Jahowa anjaha ramotkon dalan-Ni, jadi patimbulon-Ni ma ho manean tanoh in, anjaha idahonmu ma parbois ni halak parjahat. [471]

³⁵Ongga do huidah sada halak parjahat na tarlobih, na podas marbanggal songon hayu ares; [472]

³⁶dob mamontas ahu use, hape seng dong be, hupindahi, hape seng dapot be. [473]

³⁷ Sai pardiatei ma habujuron anjaha horjahon na pintor, sai hadameion do dobni bani halak sisonai. [474]

³⁸Tapi boiskonon-Ni do haganup halak sipangosei, anjaha siapkonon-Ni do ginompar ni halak parjahat. [475]

³⁹Tapi humbani Jahowa do haluahon ni halak parpintor, Ia do parlingodan ni sidea sanggah hasosakan. [476]

⁴⁰Jahowa do sipangurupi pakon na paluahkon sidea, Ia do na paluahkon sidea humbani tangan ni halak parjahat, ipabansah do sidea halani marlingod sidea Bani. [477]