Read Batak Simalungun PSALMEN 38 Bible Online

PSALMEN 38 - Batak Simalungun bible

PSALMEN 38

¹Psalm ni si Daud. Bahen pardingatan.

²Ham Jahowa, ulang ma pinsang Ham ahu ibagas ringis-Mu, ulang ma ajar Ham ahu ibagas gila-Mu! [478]

³ai mangkapantik do hu bangku panah-Mu, anjaha idondoni tangan-Mu do ahu. [479]

⁴Seng be dong na jorgit bani angkulangku halani ringis-Mu, seng marhasonangan be holi-holingku halani dousangku. [480]

⁵Ai isalpui dousangku do ulungku, anjaha songon pangodoh ni siboanon na borat do ai bangku. [481]

⁶Bau masik anjaha marnanah do ugahku, halani haotoonku. [482]

⁷Gundung mando ahu anjaha unduk mardalan, martudung-tudung do ahu mardalan ari-ari.

⁸Ai milas do sab binongeihu, seng be dong na jorgit bani dagingku.

⁹Mandatei anjaha marosak do huahap, morong-orong do ahu halani parborit ni pusu-pusungku.

¹⁰Ham Jahowa, talar do i lobei-Mu sagala pangindoanku, anjaha hoih-hoihku pe seng ponop ai hun Bamu.

¹¹Sai mulbag-ulbag do pusu-pusungku, anjaha moru gogohku; haliharon ni mata pe seng dong be bangku. [483]

¹²Huan-huan pakon diha-dihangku padaoh diri humbangku, anjaha sindohorhu mandaoh-daoh jongjong. [484]

¹³Na manguhurhon hosahku, manaon jarot bangku, anjaha halak na mangindahi hamagouanku mansahapkon hasedaon bangku, layur-layur ari do sidea manranggihon tipu. [485]

¹⁴Tapi anggo ahu nengel mando, seng marpambogei, songon halak na longah do ahu, na so pabuha pamanganni. [486]

¹⁵Tongon, songon halak na so marpambogei mando ahu, na so dong balos ibagas pamanganni. [487]

¹⁶Ibagas ai Ham do hupanalom, ale Jahowa; Ham ma na marbalos, ale Jahowa Naibatangku. [488]

¹⁷Nini uhurhu, “Gendo ulang marmalas ni uhur sidea mangidah ahu, ulang mangenjeng sidea halani na tarlandit ai naheihu.” [489]

¹⁸Ai narus do ahu sihol targompang, anjaha sitarononku jonjon do i lobeihu.

¹⁹Tongon, husopotkon do salahku, anjaha huhoruhon do dousangku.

²⁰Tapi margogoh do na mamunsuhi ahu, anjaha buei do sidea na mandomdomi ahu seng marhala.

²¹Ibalaskon sidea do na jahat balas ni na madear, anjaha ilawan ahu halani huporluhon na madear. [490]

²²Ulang ma tadingkon Ham ahu, Ham Jahowa, ulang ma mandaoh-daoh Ham humbangku, Ham Naibatangku! [491]

²³Papodas Ham ma mangurupi ahu, Ham Tuhan, haluahonku! [492]