Read Batak Simalungun PSALMEN 39 Bible Online

PSALMEN 39 - Batak Simalungun bible

PSALMEN 39

¹Bani pambobai koor. Bani si Jedutun. Psalm ni si Daud. [493]

²Nini uhurhu, “Jagaonku ma parlahouhu, ase ulang mardousa ahu marhitei dilahku; bahenonku do huntam bani pamanganku, sadokah jongjong halak parjahat i lobeihu. [494]

³Hupalongah do diringku, seng marsahap, sip do ahu age pasal na madear tapi lambin gunsang do pangahapanku; [495]

⁴lambin milas pusu-pusungku ibagas, lambin gara do huahap sanggah na marpingkir-pingkir ahu; jadi ningku ma marhitei dilahku, [496]

⁵ʻPatugah Ham ma, ale Jahowa, ajalhu bangku, pakon sibar-sibar ni ari-aringku, ase hubotoh na galek do ahu.ʼ [497]

⁶Tongon do, domma itotapkon Ham ari-aringku piga-piga totap tumang, dokah ni umurhu hira na lang do i lobei-Mu; doskon sangombus hosah do hansa jolma in, age pe totap jongjong. Sela. [498]

⁷Songon halinoh do hansa jolma in mardalani, iparsurai na so marguna; sai patumpuhon do ia, hape seng ibotoh, atap ise mambuat ai use. [499]

⁸Sonari aha do sipaimaonku, Ham Tuhan? Hu Bamu do ahu martenger ni uhur.

⁹Paluah Ham ma ahu humbani ganup panlanggaronku, ulang ma paturut Ham ahu ipahiri-hiri halak na oto. [500]

¹⁰Longah mando ahu, seng hubuha pamanganku, ai Ham do siaturhon ai. [501]

¹¹Padaoh Ham ma lonsing-lonsing humbangku, madamor do ahu ibahen pangodoh ni tangan-Mu. [502]

¹²Anggo iajar Ham jolma in marhitei pinsang-pinsang halani hasalahanni, gabe iparseda Ham do hinajengesni songon ginagat ni ngitngit; doskon sangombus hosah do hansa jolma in. Sela. [503]

¹³Sai tangihon Ham ma tonggongku, ale Jahowa, paeleng Ham ma pinggol-Mu bani doruh-doruhku, ulang ma sip Ham mangidah iluhku, ai partoloh do ahu i lambung-Mu, anjaha panginsolat songon na lobeihu ganup. [504]

¹⁴Padaoh Ham ma pangkawah-Mu humbangku, ase suang ahu marmalas ni uhur, paima misir ahu, anjaha lang dong be.” [505]