Read Batak Simalungun PSALMEN 40 Bible Online

PSALMEN 40 - Batak Simalungun bible

PSALMEN 40

¹Bani pambobai koor. Humbani si Daud. Sada Psalm.

²Marpangarapan tumang do uhur hubani Jahowa; jadi ipaeleng do diri-Ni hu bangku, anjaha itangihon do dilo-dilongku.

³Idokdok do ahu humbani godung hamagouan, humbani hubang na malhot; ipajongjong do naheihu hu atas ni dolog batu, ipatotap do langkahku. [506]

⁴Ibere do doding na bayu hubagas pamanganku, doding puji-pujian bani Naibatanta. Idahon ni buei halak ma ai, gabe mabiar anjaha martenger ni uhur bani Jahowa. [507]

⁵Martuah ma halak na mambahen Jahowa hatengeran ni uhurni, na so ra marbalik mangirikkon sigijang uhur, atap hubani sihorjahon ladung.

⁶Buei do halongangan ampa ranggian-Mu, na dob binahen-Mu bennami, Ham Jahowa Naibatangku; seng adong na songon Ham. Porini sihol ambilankononku atap baritahononku ai, seng targorani ibahen bueini. [508]

⁷Seng marosuh uhur-Mu bani galangan sisayaton ampa bani galangan sipanganon, tapi domma ibere Ham bangku pinggol na buha. Galangan situtungon pakon galangan pardousaon seng ipindo uhur-Mu. [509]

⁸Jadi ningku ma, “Tongon, roh ma ahu, bani buku na ginulung in do tarsurat pasal sibahenonku.” [510]

⁹Mangkorjahon rosuh-Mu ai do na huharosuhkon, Ham Naibatangku, anjaha ibagas uhurhu do titah-Mu. [511]

¹⁰Domma huambilankon hapintoron-Mu bani humpulan banggal, tongon, seng tutup bibirhu, Ham Jahowa, ibotoh Ham do ai. [512]

¹¹Seng huponopkon hapintoron-Mu ibagas uhurhu, hupatugah-tugah do habujuron-Mu pakon pangurupion-Mu, seng huporsou idop ni uhur-Mu pakon hasintongan-Mu bani humpulan banggal. [513]

¹²Ham Jahowa, sai ulang ma buat Ham parontou ni uhur-Mu humbangku, dear layak-Mu pakon hasintongan-Mu ma manramotkon ahu tongtong. [514]

¹³Ai hasunsahan do na manlioti ahu, seng tarbilangi bueini; domma idorab salahku ahu, gabe seng boi ahu marpangidah, bueinan do ai ase jambulan ni ulungku, gabe jut ma uhurhu. [515]

¹⁴Sai ra ma Ham Jahowa, paluahkon ahu, oloskon Ham ma, Jahowa, mangurupi ahu.

¹⁵Sai maila anjaha tarbador ma bahen Ham, sidea na manguhurhon hosahku, sai surut ma hu pudi anjaha tarbador, sidea na mangkarosuhkon hamagouanku. [516]

¹⁶Sai hirjat-hirjaton ma sidea anjaha tarbador, sagala na manggorahon bangku, “Eee, eee!” [517]

¹⁷Sai marolob-olob anjaha marmegah-megah ma ibagas Ham, sagala na mangindahi Ham; sai tongtong ma ihatahon sagala na mangkasiholi pangurupion-Mu, “Banggal do Jahowa!” [518]

¹⁸Madoyuk anjaha masombuh do ahu, tapi idingat Tuhan do ahu. Ham do pangurupi ampa sipaluah bangku; Ham Naibatangku, ulang ma padokah-dokah Ham. [519]