Read Batak Simalungun PSALMEN 41 Bible Online

PSALMEN 41 - Batak Simalungun bible

PSALMEN 41

¹Bani pambobai koor. Psalm ni si Daud.

²Martuah ma halak na marpanatap bani halak na galek; bani panorang hasosakan, sai paluahon ni Jahowa do ia. [520]

³Jahowa do na manramotkon ampa na pagoluhkonsi, anjaha martuah do ia bahenon-Ni i tanoh on; seng anjai ondoskonon-Ni ia hu tangan ni munsuhni. [521]

⁴Jahowa do na manatangsi bani podomanni sanggah boritan, mubah do ibahen haganup pangandunganni.

⁵Ningku do, “Ham Jahowa, maidop ma uhur-Mu bangku, pamalum Ham ma ahu, ai dompak Ham do ahu mardousa.” [522]

⁶Isahapkon imbangku do na jahat dompak ahu: Sadihari do ia matei, ase magou goranni?

⁷Anggo dong halak na manorih ahu, ladung do isahapkon; na sambor do ipatumpu-tumpu uhurni, anjaha i darat isahap-sahapkon ma ai.

⁸Ganup na marsogam ni uhur bangku marhusip-husip pasal ahu, na jahat do ipingkir-pingkiri sidea dompak ahu.

⁹Domma mangonai bani naborit na parah, anjaha ia, na tibal-tibal ai, seng anjai hehe be. [523]

¹⁰Gari huan-kuanku, hatengeran ni uhurhu, na rap mangan pakon ahu, iangkat do naheini laho mantadahkon ahu. [524]

¹¹Tapi Ham Jahowa, sai idop ma uhur-Mu bangku, pajongjong Ham ma ahu, ase mambalas ahu bani sidea. [525]

¹²Marhitei on botohonku ma, paboa na marosuh do Ham bangku, anggo seng be marsurak-surak imbangku dompak ahu. [526]

¹³Anjaha ahu, ibagas hasintongankai, itatang Ham do ahu, anjaha ipajongjong Ham do ahu hu lobei-Mu tongtong. [527]

¹⁴Napuji ma Jahowa, Naibata ni Israel, humbani na basaia ronsi sadokah ni dokahni. Amen, amen. [528]