Read Batak Simalungun PSALMEN 42 Bible Online

PSALMEN 42 - Batak Simalungun bible

PSALMEN 42

¹Bani pambobai koor. Doding podah humbani ginompar ni si Korah.

²Songon pangkasiholi ni ursa bani bah mardalan, sonai do pangkasiholi ni tonduyhu Bamu, Ham Naibata. [529]

³Horahan do tonduyhu bani Naibata, bani Naibata na manggoluh in; antigan pe das ahu, ase huidah bohi ni Naibata? [530]

⁴Iluhku do sipanganon bangku arian pakon borngin, halani manipat ari do ipangkatahon halak bangku, “Ija do Naibatamu?” [531]

⁵Ai ma na sihol ingatonku anjaha huuseihon uhurhu ibagas, ai ma na rap ai ahu pakon halak na mabuei marayak rumah ni Naibata, marhasoman sora olob-olob ampa puji-pujian pakon halak na laho marpesta. [532]

⁶Mase sai unduk ho tonduyhu anjaha rusak ibagas diringku? Arapkon ma Naibata, ai sai na pujionku ope Ia, Sipaluah bangku anjaha Naibatangku! [533]

⁷Unduk do tonduyhu ibagas diringku, halani ai, sai huingat do Ham hun tanoh Jordan pakon hun pardologan Hermon, humbani Dolog Misar.

⁸Marsiarahan do bah mardalan na manjadihon pardosong ni sampuran-Mu; ganup ombak pakon gilumbang-Mu manangkobi ahu. [534]

⁹Arian itongos Jahowa idop ni uhur-Ni, anjaha bornginni mandoding ma ahu Bani, sada tonggo bani Naibata ni hagoluhanku. [535]

¹⁰Ningku ma dompak Naibata, batu ginggingku, “Mase ma lupa Ham bangku? Mase ma maningon martujung-tujung ahu mardalan halani odoh-odoh ni munsuhku?” [536]

¹¹Songon na hona tikam do holi-holingku, ibahen na ipahiri-hiri imbangku ahu, ai manipat ari do ihatahon sidea bangku, “Ija do Naibatamu?” [537]

¹² Mase sai unduk ho tonduyhu anjaha rusak ibagas diringku? Arapkon ma Naibata, ai sai na pujionku ope Ia, Sipaluah bangku anjaha Naibatangku. [538]