Read Batak Simalungun PSALMEN 44 Bible Online

PSALMEN 44 - Batak Simalungun bible

PSALMEN 44

¹Bani pambobai koor. Doding podah humbani ginompar ni si Korah.

²Ham Naibata, domma ibogei pinggolnami sandiri ibaritahon ompungnami bennami, pasal pambahenan na binahen-Mu bani goluh ni sidea, bani panorang na basaia. [544]

³Marhitei tangan-Mu iusir Ham do bangsa sipajuh begu-begu, tapi isuankon Ham do ia sidea; iboiskon Ham do bangsa-bangsa, tapi ipararat Ham do ia sidea. [545]

⁴Ai sedo marhitei podang ni sidea dapot sidea tanoh in, sedo botohonni mambahen monang sidea; tapi tangan siamun-Mu pakon botohon-Mu ampa haliharon ni bohi-Mu do tene, ai iharosuhkon Ham do sidea. [546]

⁵Ham do Rajangku, ampa Naibatangku, na manongos haluahon bani Jakob. [547]

⁶Marhitei Ham ijuar hanami munsuhnami, marhitei goran-Mu ilotloti hanami do imbangnami. [548]

⁷Ai sedo bani siorhu ahu marpangajaman, anjaha sedo podangku pamonang ahu. [549]

⁸Ham do paluah hanami humbani sagala imbangnami, Ham do mambahen tarbador na mandomdomi hanami.

⁹Ibagas Naibata do marmogah-mogah hanami ari-ari, anjaha pujionnami do goran-Mu sadokah ni dokahni. Sela.

¹⁰Hape sonari itulak Ham do hanami, anjaha ipaturut Ham hanami bador; seng bingkat Ham mangkasomani balanami. [550]

¹¹Ibahen Ham do hanami manginsurut humbani munsuhnami, gabe irampas na mandomdomi hanami do hanami.

¹²Iondoskon Ham do hanami songon biribiri sisayaton, ierap Ham do hanami i tongah-tongah ni bangsa sipajuh begu-begu. [551]

¹³Ijual Ham do bangsa-Mu seng pala marboli, anjaha seng maruntung Ham humbani harga ni sidea. [552]

¹⁴Ibahen Ham do hanami sipahiri-hirion ni simbalognami, parbileian pakon siapason ni halak na marianan inggot hanami. [553]

¹⁵Ibahen Ham do hanami gabe umpama i tongah-tongah ni sipajuh begu-begu, siupirhonon ni ulu i tongah-tongah ni bangsa-bangsa. [554]

¹⁶Jongjong do i lobeihu habadoronku ari-ari, anjaha hailaon do manrungkub bohingku, [555]

¹⁷halani sora ni na mangapasi pakon na manrisai, halani pangkawah ni munsuh pakon na mandomdomi ahu.

¹⁸Ganupan ai domma mangonai bennami, tapi seng lupa hanami Bamu, anjaha seng mangeluk hanami humbani padan-Mu.

¹⁹Seng marbalik uhurnami, anjaha seng manlembang langkahnami humbani dalan-Mu; [556]

²⁰age sonai iropuki Ham do hanami bani ianan ni sorigala, anjaha irungkubkon Ham do hagolapan bennami.

²¹Porini ihalupahon hanami goran ni Naibata, anjaha ipaherbang hanami tangannami bani Naibata silegan, [557]

²²mintor lang ma pareksaon ni Naibata ai? ai Ia do na mananda rusia ni uhur. [558]

²³Tongon, halani Ham do ibunuhi hanami manipat ari, doskon biribiri sisayaton do hanami ihira sidea. [559]

²⁴Puho ma Ham, mase sai modom Ham Tuhan? Puho ma Ham anjaha ulang ma tulak Ham hanami sadokah ni dokahni. [560]

²⁵Mase ma iponopkon Ham bohi-Mu, lupa Ham bani hasombuhon ampa hasosakannami? [561]

²⁶Ai unduk do tonduynami das bani orbuk, longkot bani tanoh do boltoknami. [562]

²⁷Marugas ma Ham mangurupi hanami, anjaha paluah Ham ma hanami halani idop ni uhur-Mu.