Read Batak Simalungun PSALMEN 45 Bible Online

PSALMEN 45 - Batak Simalungun bible

PSALMEN 45

¹Bani pambobai koor. Inggouni: Bunga silundat. Humbani ginompar ni si Korah. Doding podah. Doding marsihaholongan.

²Marsual-sual do humbagas uhurhu hata na madear, pajojoronku ma dodingku bani raja in; Songon mata pena do dilahku ibagas tangan ni halak na pandei manurat. [563]

³Ham do sijengesan i tongah-tongah ni anak ni jolma, hajengeson do inahkon bani bibirmu, tongon, Naibata do mamasu-masu ham tongtong. [564]

⁴Solotkon ham ma podangmu bani binongeimu, ham puanglima, hamuliaonmu pakon jumbalangmu!

⁵Ibagas jumbalangmu, maju ma ham marhamonangan mangkopkop hasintongan ampa hapintoron. Ajaran ni tangan siamunmu ma ham mandalankon pambahenan na marhajombuton. [565]

⁶Marot-marot ma panahmu, tunduk ma bangsa-bangsa i lobeimu, anjaha madatei ma uhur ni munsuh ni raja in. [566]

⁷Hotakmu, tuannami, totap do ronsi sadokah ni dokahni, tungkot hapintoron do tungkot harajaonmu. [567]

⁸Holong do uhurmu bani hapintoron, magigi do ham bani hajahaton, halani ai do, tuannami, ase iminakkon Naibatamu minak malas ni uhur bamu, marhasurungan humbani hasomanmu. [568]

⁹Mir, aloe pakon kassia do mammorumi hioumu ganupan; malas do uhurmu ibahen parugas sigiuton na hun rumah bolon gading; [569]

¹⁰boru ni raja do deba humbani siparugasmu; i siamunmu do jongjong puangbolon marpakeian omas na hun opir. [570]

¹¹Tangihon ham ma, ale boru ni raja in, tonggor ham ma, paeleng ham ma pinggolmu, halupahon ham ma bangsamu pakon rumah ni bapamu! [571]

¹²Sai iharosuhkon raja in ma hinajengesmu, ai ia do tuanmu, tunduk ma ham manombah hu bani.

¹³Roh do boru Tirus mamboan siluahni, anjaha na sangap-sangap humbani bangsa ai marsombah mambuat uhurmu. [572]

¹⁴Marpakeian jenges do boru ni raja in, na binuat bani omas do pakeianni. [573]

¹⁵Marpakeian na hinarawang do ia ibobahon bani raja in, anak boru mangirikkon, huan-kuanni mangkasomanisi;

¹⁶marhasoman malas ni uhur ampa olob-olob ibobahon ma ia, masuk hu rumah bolon ni raja in.

¹⁷Sai anakmu ma na manggantih na lobeimu, ham ma na pabangkit sidea gabe panrajai bani sab nagori on. [574]

¹⁸Baritahononku ma goranmu bani halak marsundut-sundut, halani ai pujion ni sagala bangsa ma ham sadokah ni dokahni.